• August 11th, 2020

Mubu wasizo ulekiswa ka teko ye kutezi fafasi


KATIMA MULILO – Bolyaminzi baba tumile hahulu mwasikiliti sa Zambezi kwasilalo sa Kayuwo mwasilalanda sa Kongola, babilaezwa kitekiso yefosahezi yamubu, ili teñi manduna baminzi bakulubelwa kuli balekisa mubu kwa makumuca ni mazwazuhule ka teko ye kutezi fafasi.
Mubu omunde wa sizo, obatoba eza walihekele zepeli ulekiswa kamasheleñi amwahala N$2 500 ni N$3 000 ki manduna ili kuli baekeze falituwelo zabona zelikana N$1 100. 

Tekiso yamubu seli mukwa wakamita kwalilalo zecwale ka Mubiza, Liselo ni Kayuwo, mi manduna basebelisa mubu kuba simbule sa masheleñi. Kamukwa ocwalo baleki babeya mubu mwalukwakwa nihaike taba yeo ihanisizwe mwalibaka zamubu wasizo, mi kacwalo bolyaminzi basebelisa libaka zelikani mi likomu zabona halisana hande mafulelo ni manwelo amezi.

New Era nezibisizwe kuli baeteleli basizo babunolo kwakubushiwa mi babañwi nebafilwe limbayambaya zese belekile kale ni zeñwi cwalo kakucincanisa ni mubu, ni kusiya sicaba sinze sinyanda nikusaba kubuza manduna. “Lusweli kulatehelwa kiliemba zetuna zamubu bakeñisa manduna baluna, banze balekisa mubu basa lubuleleli, mi baba nyanda hahulu kiluna. Habalateleli mulao waku kandekisana ni sicaba. Baeteleli basizo baswanela kubukeleza sicaba kakuli kiluna bababaleli ba mubu. Kono cwale basweli kulekisa bukamuso bwa luna,” nekubulezi muyahi wa Mashi kwa Kongola yana kupile kusapundwa kasabo yakuhalifelwa. “Amutalime silalo sa Kayuwo, mubu ulekisizwe kwa mazwahule babasina ni mapampili, buñata bwa bona basimuluha mwanaha Zambia. Uamuhela cwañi N$3 000 hala mubu ofitelela bima? Bayahi banaha China nibona sebaliteñi,” nekubilaezi muyahi wa Choi.

Muñoli kwa khuta ya Choi Bornwell Mutelo niyena nafitisize manzwi aswana, mi naize babilaezwa kimisunga yekazuha kwapili, kakuli mubu unze ufiwa kamafosisa. Naize kuna ni likomano zamushobo zese ngile lilimolimo hakutaha kwamiseto yalikhuta, kono cwale kubonahala kuli ki kopano ya batu. – osimasiku@nepc.com.na

 


Obrien Simasiku
2020-04-27 09:29:45 | 3 months ago

Be the first to post a comment...