WINDOKO – Niha litukiso neli ezizwe hamoho cwalo nibalipisinisi bane balekile libyana zakuyolekisa kwamukiti wasilimo wa Lusata, mukiti uyemisizwe konji isaho. Sibuabui wa khuta ya Mafwe Betty Mpango nanitifalize kuyemiswa kwamukiti viki yefelile, mi naize kalulo yeo ne ezizwe kukuteka sililo sayo nali ngambela Dixon Mubita Lusepani yana timezi viki yale, ana nililimo zemashumi asupile kasilisiñwi.

Natokwahalezi kwa Chinchimane kasamulaho akukula nako yekuswani. Nyandi ngambela nailo bulukwa Lasunda viki yefelile kwa Sesheke. Mpango naize nekulumelelanwi ni khuta ya Mafwe kuli kakuli sicaba sisweli kulila litukiso kaufela zamukiti liyemiswe kufitela hakukazibiswa. “Ki niti mukiti wa Lusata hausana kuezahala, uka ezahala feela isaho kanako yeswana,” nekunyatezi Mpango. Mukiti wasizo wasilimo noswanela kuezahala maabani la 29 Muimunene. Lusepani nasupilwe kuba ngambela mwakweli ya Sikulu ñohola mi nakile abeleka mwaliluko la mabasi kakuba mubakweli kumuetapili kutisa hapumula famusebezi mwasilimo sa 2008 mi afetuha mulimi. Silimo ni silimo sicaba sa mafwe ni mishobo yeñwi bakubukananga kwamukiti wa Lusata.  Mukiti wa sizo oezeziwa mwakamaiso ya Mulena wa Mafwe George Simasiku Mamili, utabelwanga silimo ni silimo kwa Chinchimane mwasilalanda sa Sibbinda, ili koifumaneha khuta ya mafwe.

Lusata kimulamu obetiwe falunaka lwa tou mi kisisupo sa swalisano ya mushobo wa mafwe. Zeñwi ze ezahalanga kwamukiti kilipapali zasizo kuzwelela kwalikwata zeshelashelana. Likwata zabaopeli nibona bayofanga milumbeko kalipina, kono kezahalo yetuna kiha mulena Mamili VII habulela kwasicaba sahae. 
Lifolofolo zeshelashelana zefumaneha mwa Afilika libulaelwanga sicaba, hala zeñwi ki litou, liputi, mitobo, likubu nizeñwi cwalo. Linako zeñwi malena kuzwelela mwanaha Zambia ni Botswana batahanga nilikwata zabona kuto tabisa sicaba.