Muni wodoolopa yaGrootfontein okwa tula po omukalo wokudidilika ovakalimo modoolopa ovo ve li monghalo tai shongola, opo va pewe omayambidido.

Onghela, ominista yomayambulepo eedoolopa noitukulwa yokoushai, Erastus Uutoni okwa ti okuudite etumba eshi muni a dimumbuluka ovanhu vaye.

Okwa twikila kutya nonande ovanhu vaye va dimbulukiwa kumuni, vati natango osha vatela yoo odoolopa aishe koonono shaashi nayo otai ka mona omauwa moinima ya yooloka.

“Muni otaka findana ashike meyambulepo leedoolopa ngeenge a ka tameka okulongela kumwe nomalelodoolopa makwao meputuko, oshoyo mexumo komesho lonhele,” Uutoni ta ti.

Okwa twikila kutya exumokomesho lodoolopa oshoyo eemhumbwe dovanhu luhapu ohadi dilikwa nokumetwa komalelo opamufyuululwakalo.  Okwa twikila kutya, paemhito dihapu omalelelo opamufyuulukalo ohaa kala e shi eemhumbwe dovakwashiwana ngaashi omhumbwe yedu lokutunga, oshoyo omaumbo unene tuu vati kwaava va loloka okudja novadali. “Ohatu indile ovaleli ava va tameke okulandifa omadu e na ondado tai dulu okulidiinikilwa koshiwana, opo ovanhu va dule okukala ve na omalukalwa avo vene,” Uutoni ta ti.

Okwa tumbula yoo kutya epangelo keshe odula ohali yandje omauwa ngaashi edu la ningilwa omakonaakono e lixwa po oshoyo omaumbo koshiwana. “Onda hala mu shikule omilandu edi da tulwa po kekotamhango laNamibia kutya, omauwa aeshe tamu yandje kovakwashiwana okwa konaakonwa nawa unene tuu edu oshoyo omaumbo. Eshi onda teelela shi kale sha tulwa moilonga fiyo omeedula nhano twa taalela,” Uutoni ta ti.

Okwa twikila kutya eyambulepo leedolopa yaGrootfontein okudilila kuMuni vati ola kuma oinima ya fika puihetatu moshitukulwa, ngaashi okuyambula po onghalo yovanhu ve li komaushai moku va tungila omaumbo e li xwepo.

Muni natango vati okwa teelelika a ka vatele neenhele di li komalukanda mokudikaleka da yela, okuyandja omadu okutunga kovanhu, okukala ve na ekwatafano la kola neekomitiye dihapu moshitukulwa naikwao ya wedwa po.  taimihaihambo2000@gmail.com