Omulumenhu weedula 45 okwa kwatwa po molwokuvaka po eengobe hetatu damushiinda shaye ndele taka teya vali eumbo lombushiinda mukwao. 

Oiningwanima ei oya ningwa mexuliloshivike moRuacana moshitukulwa shaMusati.

Otaku hokololwa eengobe di da vakwa oshivike shadja ko dili pongushu yoN$54600.

Otaku hokololwa kutya omufekelwa ou ota tamanekwa natango moshibofa shokuteya omaumbo, omo kwa li vati natango a teya eumbo oshivike sha dja ko.

Omukonakoni woimbuluma moshitukulwa shaMusati, omupedu Commissioner Moses Simaho okwa hokolola ta ti omufekelwa okwa shinga eengobe koshuunda noku di twala komukunda u li popepi nomukunda wavo.

Oshiningwanima shikwao, opolifi moshitukulwa shaKhomas otai konakona oshibofa shomulumenhu vati a dipaa eengobe nhano mofaalama i li moWindhoek mexuliloshivike.

Opolifi oya hokolola tai ti omufekelwa okwa tutumbila ombelela yeengobe nhatu motuwa yaye noku faduka po.

Eengobe odi li pongushu N$ 92 000.00, nomakonakono opolifi otaa twikile.

Lopokati opo, omulumenhu weedula 21 okwa kwatwa po shaashi a vaka eedalate doshingoloti di li pongushu N$3000.00 moTsumeb.

Oshimbuluma shikwao, okakadona keedula 22 oka kwa telwa onghonga moixwa komulumenhu ndele ta faduka po moodolopa Khorixas mexuliloshivike.

Omakonakono opolifi otaa twikile ayeshe moimbuluma ya longwa mexuliloshivike.

fhamalwa@nepc.com.na