Ethimbo lyomatango omanene AaNamibia oyendji ohaya kanitha oomwenyo dhawo okupitila miiponga yiihauto, omadhipagathano niimbuluma tayi indjipala onkene ehangano lyoMotor Vehicle Accidents Fund (MVA) olya gandja omakumagidho okushonopaleka iiponga pethimbo ndyoka.
Omukuluntu gwehangano lyo-MVA Fund Rosalia Martins-Hausiku okwa kumagidha oshigwana ta ti, mboka taya katalela po aakwanezimo yawo kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndyoka lyokili nomumvo omupe.
“Otwa hala ethimbo ndyoka lyi kale lyaa na iiponga yasha, sho shoka tatu kumagidha aahingi yiihauto ya simaneke omandhindhiliko oshowo ya hinge nuukeka,” Martins-Haufiku ta kumagidha ngaaka.
Ta ti, uuna oshiponga sha holoka mondjila dhenga konomola yopolisi 10111 nenge MVA 0819682.
Omukuluntu gwopolisi moshitopolwa shaShana Nafal Lungameni Sakaria naye okwa londodha wo aahingi kaaya hingilile, yo kaaya hinge ye li kohi yomaluvu nenge ya vulwa.
“Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka kokwaa landula omandhindhiliko gomoondjila oshowo okuhinga ye li kohi yiikolitha,” Sakaria ta ti ngaaka.
Ta ti, okuhingilila itaku ti okuthika. Nonando oto hingi kashona owuna okuthika ashike, omolwegameno lyoomwenyo mwa humbata mohauto yoye oshoyo dhayakweni ye li wo moondjila.
Sakaria okwa ti oshitopolwa shaShana osha ilongekidha okulwitha iimbuluma pethimbo ndika, onkene itaya ka pitika nando omuntu ta ka konda nenge ta ka teya oompango adhihe dha tulwa po.
“Ngele oshigwana osha landula oompango adhihe dha tulwa po, nena kape na nando uuwinayi washa tau holoka. Ethimbo ndika olyokunyanyukwa ihe kali shi lyokukala momaluhodhi,” ta kumagidha ngaaka.
Natango opolisi miitopolwa yilwe yokonooli nayo oya ti oyi ilongekidha okulwitha iimbuluma mbyoka hayi indjipala ethimbo lyomatango omanene, oshoka iitopolwa mbyoka ohayi kala yu udha.
Oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga ooyene ya ka talela po kiitopolwa yilwe.
Opolisi oya kumagidha omagumbo ga kale ge na aakeeleli ethimbo alihe, oshowo ga kale ga tema pondje ethimbo lyuusiku.
Opolisi yaNamibia okupitila miikundaneki ya yooloka oya kumagidha wo aahingi yiihauto, ya hinge nuukeka oshowo okugwanitha po oompango dhomoopate.
“Omutenya omalamba naga kale ga dhima oshoka aafuthi ohaya hilwa komalamba shoka tashi ya pe kutya kamu na omuntu megumbo,” tayi ti ngaaka.
Opolisi natango oya kumagidha oshigwana natango shi kale mekwatathano ewanawa naashiinda yawo opo ya kalelathane po uuna ya mono omayinyengo ga puka. vkaapanda@nepc.com.na