Ileimo Onesmus weedula 37 okwa nyenwa omhito yoku li futila mo modolongo eshi ta tamanekwa kutya okwa kufa mo eteelelo lokaana kaye komido 17.

Omukainhu ou okwa hokoloka momhangu yamagestalata mOutapi oshivike sha dja ko, omo oshibofa shaye osha undulilwa komafiku 30 Novamba 2023 opo ku ningwe omakonako eli xwa po.

Omukulunhu koshikondo shokukonakona oimbuluma wopolifi moshitukulwa shaMusati, omupedu Commissioner Moses Simaho okwa hokolola ta ti Onesmus okwa longifa oshiti osho vati a tula molutu lokaana kaye nelalakano lokukufa mo eteelelo olo lali li na omwedi umwe.

Okaana vati oka tameke oku kanifa ohonde neenghono, osho sha eya opo veka kufe mo meumbo noku ka twala koshipangelo oko eendokotola da dimbulula kutya eetelelo ola kufwa mo.

Onesmus nomona aveshe ova kwatwa po, ashike okaana oka kala moshipangelo keli momake opolifi, omanga ina a ya kodolongo.

– fhamalwa@nepc.com.na