ONGWEDIVAS– Namibiab ǀawa!namn di tarekhoedi !âb Oshana !kharib !nâb ge sī!nâhe ǁkhā mîǁguiba ge ū, tare ǀawa!namde ūkhâiǂai!nâ tsî ǁîde ǀgapi !harodi !nâ ǁāǁāsa. ǁNā !âba !khōdana hâ Inspekter Beverley Nawases, ge ra ǁawoǁawo tarekhoedi ra ǁāǁāhe, hâ ka !harodi !nâ ǀgapiǀgapihe tsî ǀgutikō !ēde hâ a aore kurisagu ǀkha māhesa, ǁnās a ǁîs di beros !aroma tis ra mîse. 

“!Kharu ge ǁaegu !nâ gu ge aorekhoegu ǀguiga hoa !âgu !nâ gere gaoǂam, nēsi i ga !auga!hūgu ǁga sîǂoahes sîsenni !aromas kas tamas ka i o ǀgaisa !harodi !nâ ǂnûs kas hoasa. !Nāsa !gôab aorekhoegu ge ǀawa!nam sîsengu !aroma gere ǂgaikhâi tsî !gaeǂgāhe,” tis ge Nawasesa ge mî. ǁÎs ge ge mî, beros âs ra ǁawoǁawo !khaisa tarekhoedi ǁîdi sîsenni tsî ǁkhāǁkhāsens ǀkha huru tidesa tsî ǁgoaǂuixa!nâ !harodi !nâ nî ǂgâsa. 

Inspekter Nawases ra mîsa !oa di ge ǀnî soagu !nâ tarekhoede !hoabasensa ra sau tsî ǁnā-amaga mî-guigu ra ū!nâhe !harode xu ra ǂgōsen.”Sid age hoaraga tarekhoedi hîa Namibiab ǀAwa!namn ǀHûs- !nâ Oshana ǀKharib !nâ a sîsenxadi !oagu !ereamxasiba ūhâ tsî ǁnās ǀkha ǁîdi di !gâise ûis tsîna. 

Tarekhoedi ge nēsi kai !harodi hîa mîǁguiga nî ū!nâhedi !nâ ra ǂgâ. Sida ǀkharib !nâ di ge !nāsa Inspekter !harode tarekhoedi xa !khōdanahe hâ tsî nēs ǀkha Oshana kharib ra ǁgau tarekhoede ǁāǁāsab ra aimâi !khaisa ra !gāsa kai,” tis ge ge mî. 

ǁÎs ge ge mî, nēsi di 52 tarekhoede ǁkhāǁkhākhâis proxrammi !nâ a !âsa hîa ǁgauǁgaus kharaǀkharasin hâs disa ra ǁgausa ai!â di ǁaupexa 100 ǁkhāǁkhākhâihe ra khoena xu 20 ǀguide ge tarekhoede !khōǂgā hâ is ose. “Nēsi da ge 40 xu 45 tarekhoedi ǁkhāǁkhākhâisa ra !kharu!nâse ra hō. 

2012ǁî kuriba xu nē ǁkhâb kōse di ge 69 tarekhoede ǀgapi !harodi !nâ ge ǂnûikhâihe,” tis ge ǁîsa ge mî. Nēs xōkhān ge ǁîna ǀhûhâsib ais tsîna !ereamxasiba tani hâ, ǁnāpan nî ǀhûhâsigu ǁga ǂoa tsî îbe-îbe !gomma ra tsâ omaride ǂanǂui tsî ǁîna huiba māse. ǁÎs ge ge mî, ǀawa!namn ǀhûs marikurus ǂnûiǂgā tama hâsa tsîn ǁîna ǀhûhâsiga huis !aroma ǁîna xu aitsama marina mā tamas ka i o marina ǀhaoǀhaos ǁaxasina ra dīsa.