Ehangano loku andjaneka olusheno laNamPower ola yambidida eefikola hetatu domoshitukulwa shaShikoto noikwafifohongo ya yooloka mwakwatelwa eengulumambo.

Oikwafifo aishe ya pewa eefikola oi li pongushu yoshimaliwa shemilliona sheeN$3.1.

Eefikola dimwepo oda tungilwa oudjowo opo ovanafikola vaha longife va li ngeenge oushitwe tau fana.

Okwa didilikwa eefikola dihapu moshitukulwa shaShikoto da taalela omashongo a yooloka ngeenge tashi ya poipumbiwa yeefikola.

Pefimbo ta popifa oshiwana oshivike sha djako, omunambelewa a dja kehangano loNamPower Simeon Amunkete okwa ti osha fimana ngeenge okaana okaNamibia ka hongwa opo ka ninge omunailonga momaifano a yooloka.

Onghee okwa ti elalakano laNamPower okuyambidida oshikongo shehongo unene tuu keefikola di li momhumbwe yoikwafifo opo ovahongifikola ovanafikola va longe noupu.

Okwa weda po ta ti NamPower ota lalakanene yoo vali okushakeneka epangelo ondjilakati.

“Ngeenge pofikola ope na oikwafifohongo ya wana otashi tuu ovanafikola omukumo ve li honge nelitulemo notashi eta oidjemo iwa kexulilo lomudo,” Amunkete ta ti.

Okwa yelifa ta ti ovanafikola ovapumbwa oku li hongela momudingonoko muwa ngaashi meengulufikola dopashinanena opo vaha longwe kodula ile va dengwe komhepo.

Omukulunhuwiliki wehongo moshitukulwa shaShikoto, Aletta Eises okwa ti omakwafo a pewa eefikola ota ka eta elunduluko liwa noidjemo movanafikola noshoyo okuxwaxwameka ovanafikola ve li honge nondjungu.

Lwopokati opo, ovanafikola kofikola Mwadinomho Combined School ova ya pewa omapando eenghaku kehangano loNever Walk Alone.

Ehangano Never Walk Alone olo limwe la didilikwa ha li yambidida ovanafikola ve li momhumbwe yeenghaku.

Ovanafikola vahapu meefikola domonooli ova pewa eenghaku okupitila mehangano e li.

Ovanafikola kofikola Oshikunde Combined School moshitukulwa shaHangwena navo ova yambididwa nomidjafikola kehangano loNAMCOL oshivike sha djako.

fhamalwa@nepc.com.na