Elelodoolopa yaMuthiya natango ola hoolola Johannes Ndeutapo a shune koshipundi, yee a lele ongamayola wodoolopa oshikando oshitatu. 

Pefimbo a li ta nangekelwa koshipundi, okwa tumbula kutya yee okuudite etumba lakula okuingida kutya Omuthiya paife odoolopa ya dja ko.

Ndeutapo okwa ti kutya omanga yee e li koshipundi omauwa oku na okuya kovanhu nonande itaa uya taa tondoka.

Okwa twikila kutya eenhele dihapu mOmuthiya paife oda longwa, noda longekidwa okutungwa opo di dule okutulwa pamufika wodoolopa.

Ndeutapo natango okwa yelifa kutya, moule weemwedi 12 da ka pita, yee opamwe nelelo lodoolopa ova longela kumwe noudiinini, opo va dule okueta otenga yomeva yakula modoolopa oyo tai  ka vahapu komimbinga yenota.

“Otenga oya pwa okulongekidwa, nonande pa pumbwa ashike ounima vaniingholi. Ngeeenge ohandi shi tula meepelesenda ohandi ti otu li po95. Otwa teelela ashike Namwater a longe mo oupyakadi womeva ou we lihanena oitukulwa ihapu, nongeenge oinima ya shuna kouwa, otenga oya teelelika i ka tulwe omeva, oo taa a ka kwafa ovanhu oule wamafiku ahetatu fiyo 10 ngeenge omeva a pata,” Ndeutapo ta ti.

Okwa ti yoo okwa hala ovakwashiwana va kufe ombinga mokuvatela moinyangadalwa aishe ei tava dulu okuvatela meyambulepo lodoolopa.

Elelodoolopa laMuthiya fiyo opapa oli na omhito ya yeuluka, ihe na omupedumayola.

Beata Nashongo okwa hoololwa a ninge omunashipundi, omanga, oilyo yo komitiye oEster Chronelius voo naPaulus Shimbangala.