OMUTHIYA- Ngoloneya woshitukulwa shaShikoto Penda Ya Ndakolo okwa kunghilila ovanhu ava tava hambelele molwefyo laGeingob opo veshi fele okalambo.
Ya Ndakolo edi okwe di popya poshivilo dimbuluko shongalamwenyo nanakufwa Omupresidente osha sha li kOmuthiya mEtitatu.
“Ngeenge efyo laGeingob ove ina li kukuma mwena. Paife ovanhu otava popi omahokololo oupote kombinga yefyo lOmupresidente omanga vamwe otava hambelele nomitima di hadi ehafo,” Ya Ndakolo ta ti.
Ovaleli veendodo da yooloka, ovanafikola, novafitaongalo va dja keengeleka da yooloka okwa li vangudumana kongeleka yaElcin mOmuthiya okuyandja efimaneko kuGeingob.
Ya Ndakolo okwa tanga ta ti Geingob okwa li omuleli muwa a fimaneka ovanhu aveshe veendodo da yooloka.
“Geingob otwa longa naye efimbo lile, okwa li a ninga ne ominista yetanga leameno nokonima okwa shuna nge koshipundi shoungoloneya shaashi okwa li elinekela nge,” ta ti.
Onghee okwa ti okushi ouwa waGeingob shaashi okwa longa naye mokuhambula po oshitukulwa shaShikoto.
“Natu lileni omuleli wetu nombili pehe na omahokolola oipupulu opo tu kale tuna oukumwe,” ta ti.
Moshipopiwa shaye omukwatakanifi wongudu yoSwapo moshitukulwa shaShikoto, Armas Amukwiyu okwa ti ongudu yoSwapo oya kanifa omuleli muwa e na elandulafano.
“Geingob okwa li e na oukumwe e hole okutula ovanhu kumwe mongudu yetu. Okwa kala e hole ovanhu ve na ombili ngeenge ve li komitumba doSwapo,” Amukwiyu ta ti.
Okwa ti Geingob okwa li omulumenhu a longo nelitulemo shaashi okwa kala alushe ta lombwele ovanhu va longe noudinini okukaleka po Swapo.
“Geingob okwa fiya po omwaka wa kula mongodu yetu. Okwa fiya a wanifa po oshilonga shaye unene tuu okutula ovanhu kumwe molwashi ka kwa li e na oukwamuhoko,” ta ti.