David Adetona
Nguuru gomukunda gwaKhomas Laura Mcleod-Katjirua kageve paveta embo eli vadika noyimaliwa yokusika ko N$280 000 lyononzugo dokurara mbali kovanekoro konyima tupu embo lyawo lyapire komundiro eli vadikire lyoyipereki konyara mvhura zina pitipo.
‘’Egano lyokusikisamo eyi yahepa nye kutupa mukumo omu nayikara asi natuvenye tuliturenimo turuganene kumwe nonombunga depangero, nonombunga dopaumwene ntani vaNamibia ava vana hara kuvatera omu natukara nomukara gwina gokuninka asi kuna kulipakera sinka nyamwetu, yimo ana kutanta ngoso nguuru apa nye kageve embo eli paveta moKatutura.
Age simpe katente asi mukaro gomambo kovantu vetu simpe ure unene guna kara asi gukapwepo morwa vekero lya Timoteus Shaningi kuna kara epata limwe tupu ano ava masere simpe kuna kundindira nawo vagwane mambo, apa tuna kuhuyunga ngesi awo kuna kara vahana mambo, sinzi sovantu vangesi kuna kara momukunda gwaKhomas.
Age simpe katentye asi mberewa zendi zagwanako evango lyokudika embo morukanda Okurwangava moOnyati street evango lyonnomora 331 momukunda gwaThobias Hainyeko omu vadika embo eli noyimaliwa yokusika ko N$280 000.
Nguuru kafatwilire momunene asi mbunga ezi vana kutumbura asi sinka Ashlee Groenewald Four Walls properties kwadika embo eli, awo yiwo nye vawapukurura evango eli pwavene omu varuganesa yimaliwa yokiusika ko N$1000 000 omu vayitura nayo asi yimwe vagavako kokuvatera vantu ava.
Kampani ezi zatura hena efano asi embo lyokufana ngapi navadika pwavene ntani yiyo nye vatura asi nayinye kuyipakerera yahepa kukara N$280 000 apa nye ngava kamana embo eli pwahana kukara yimaliwa ngayihupako nkenye eyio.
Ava kava kere vana hafa, vekoro lyaShaningi, mukurona po pwava vatunga mositata, kapandwire elituromo lyanguuru nomberewa zendi, vakansela womukunda gwaKhomas ntani ndango zositata saVenduka omu navenye valituramo vavatere ekoro eli mokubvatungira embo lina wapa pomu navarara nage nekoro lyendi.
Mukurona gona godoropa zaVenduka Joseph Uapingene katente asi yiruganeso kuna pumbwa unene yiyo nye yina kuninkisa asi vapire kudika mambo gomanzi gokugwaneka vantu navenye.
‘’Ndango zegendeso mukunda gwaKhomas ntani nonmdango zositata kuna lituramo unene mokupapara nombatero omu nava vatera vantu vawo vatunga monomukunda edi.
‘’ Vantu sivaro sina gwana unene vana kara asi kuna kara noruhepo kapi vana kara neparu lyewa omu vana kunana noudigu ezuva nalinye ndi nagenye.
Yipo nye, asi mulyo unene asi twahepa kugenderera mokuwapukurura evhu omu natulipakerera natuvenye novakwetu vakara nelikwamo lyekuliko,’’ yimo ngoso ana kutanta mukuronagona gositata.