Ohamautsi – Omupresidente gwotango gwaNamibia Dr. Sam Nujoma okwa waimine omalelo gopamithigululwakalo agehe gahetatu, mokuthikama ye li ompinge noondjokana dhomashenge.
Pethimbo a li ta popitha oshigwana koshituthi shomagongo shoka sha li kegumbo lyelenga enene lyaMbalantu Oswin Mukulu komukunda Ohamautsi moshikadjohogololo shaAnamulenge moshitopolwa shaMusati, Omukokolipresidente okwa pula oshigwana opo kaashi taambe ko oombepo nomikalo dhokondje ndhoka tadhi thiminikilwa Aanamibia nosho wo iigwana yaAfrica pakuudha.
“Omolwaashoka onda hala okuwaimima omalelo gomamithugululwakalo gokonooli ge li gahetatu oshowo Aanamibia ooyakwetu notandi yambidhidha Chief Immanuel /Gâseb, ngoka e li omunashipundi gwopakathimbo gwomalenga gopamithigululwakalo meigidho lye kutya: ‘ndika halyo emanguluko oshigwana shaNamibia sha li shi na momadhiladhilo sho sha li tashi kondjele emanguluko,” Nujoma ta ti. Nujoma okwa tsu omukumo omalelo gopamuthigululwakalo opo ga kwatele komeho uuteku netsomukumo mokati kaagundjuka opo ya vule okuwaimina etaambathano lyomithigululwakalo pokati komapipi nomapipi.
Nujoma okwa pandula okakomitiye kelongekidho lyoshituthi shomagongo.
“Natu longeleni kumwe opo tu kalekiipo uuthiga wetu. Aantu ya hangana taya longele kumwe opo ya adhe elalakano limwe molwuuwanawa woshilongo oye aluhe aasindani,” Nujoma ta ti.
Pethimbo lyoshituthi, Presidente Hage Geingob ngoka oshipopiwa she sha li sha leshwa komupevipresidente Nangolo Mbuba, okwa ti oku na eikwatopomutima omolwongushu yomuthigululwa ndjoka tayi ende tayi kana mokati koshigwana.
Onkene Geingob okwa pula opo aaleli yopamithigululwakalo ya tsikile okutekulila nokulonga aagundjuka oonkulunkedhi noshowo onkalo yopantu nuunene mokati kaalumentu naagundjuka.
Geingob okwa holola wo eikwato lye pomutuma omolwelongithonayi lyomalovu niingangamithi, iimbuluma noshowo omahepeko gopaukashikekookantu.
“Onkene moshigwana shika tashi hepekwa komanwethemo omawinayi, otwa pumbwa okukolekela mo oonkulunkedhi nomakankameno gashili mokati kaagundjuka, nuunene moshigwana ashihe, tashi ningwa okupitilwa miinyangadhalwa ngaashi shika shoshituthi shika shomagongo,” Geingob ta ti.
Kakele komukokolipresident koshituthi shika okwa li kwe ya aaleli yopamuthigululwakalo ya za komalelo ga yooloka, oominista dha kwatelwa mo Omupilima Saara Kuugongelwa-Amadhila ngoka nomusamane gwe Tona Amadhila ya gandja omagano kelenga enene Oswin Mukulu, sho ya li ya gandja efano enene.
Okwa li wo aaleli yopamuthigululwakalo ya za komalelo gAawambo gahetatu, nayamwe ya za koAngola oshowo aakalelipo yaUnesco moNamibia.