ONGWEDIVA - Oshitukulwa shaGongo oshe lipyakidila neepoloyeka da fika punhee odo tadi yandje omadeulo oshali kovakalimo.
Kansela woshikandjohoololo shaGongo Daniel Iilende okwa ti imwe yomopoloyeka okudeula omaumbo a fika po180 okulonga noimeno unene tuu oihape noingumutulu.
Okwa ti omaumbo ahapu otaa ka pewa omadeulo okudilila koDevelopment Aid from People to People (DAPP), nghee ve na okukuna nokufila oshisho oimeno yavo. Okwa tumbula yoo kutya oimeno shama ya kulu elalakano layo okupalwifa ashike ovaneumbo ponhele yokukala va lamba eefitola poo kape na oimaliwa.
Iilende okwa twikila yoo kutya natango DAPP okwa yandja opoloyeka i na sha nomadeulo okuhondja oikutu moshikandjohoololo. Omadeulo aa vati okwa nuninwa ava ve li mepupi lokudja peedula 50 opo va kale yoo ve lipyakidla nasha manga va teelela eedula dopeendjela di fike.
“Eshi otashi ka kala yoo shiwa koshikandjohoololo ashishe koonono shaashi ovanhu itava ka enda vali oinano ile va ka konge oihondjelo. Natango otashi ka patululila yoo ovahondji omhito va tameke okuhondja nande omidjalo dofikola voo tava kala tava landifa moshitukulwa.
VokOgongo natango vati ove lipyakidila yoo nopoloyeka yokuninga oufiya vokutelekela hava longo koihongoti. Opoloyeka youfiya nayo vati oinli koshi yewiliko la-DAPP. Iilinde okwa ti fiyo opapa ova kendabala okuninga oufiya vahapu ovo tava ka yandja ongomaano kwaavo ve li momhumbwe yavo unene. Okwa ti yoo ova hala unene okuyandja kovakulupe ava ve li momaumbo ihava dulu okulinyenga va ye pomafiya.
“Ovanhu vamwe natango ove na omaudu oshoyo omaulema a yooloka voo vamwe ihava dulu lela okufikama momindilo efimbo lile, eshi otashi ke va ningila shipu neenghono ngeenge tashi ya pokulongekida eemusha davo,” Iilende ta hokolola.
Epangelo vati ole lipyakidila yoo nokutungila omaumbo e li 13 oundjyuo momukunda Eembwa natango u li moshikandjhoololo shaGongo. Iilende okwa ti omwaalu woshimaliwa sha yandjwa oushona nonghee itau dulu okutungila lela ovanhu vahapu. Okwa tumbula yoo kutya oundjuwo ava tava ka tungwa ova nuninwa unene ovakulupe novanhu ve na oulema.