Festus Hamalwa
“Osha fimana ngeenge ovanhu tava ka yandja ohonde shaashi ohashi xupifa eemwenyo dovanhu, ngeno kappa li ohonde ei hai yandjwa kovanhu ngeno inandi xupa eshi nde uya koshipangelo handi vele. Eshi nde uya koshipangelo ndokotola okwa lombwelange kutya onda pumbwa ohonde molutu.”
Aa omatumbulo aFrasina Uusiku ta hokolola kombinga yefimano lokuyandja ohonde konima eshi kwa li e uya koshipangelo shaShakati efimbo loufiku a nyika ounghundi.
Uusiku okwa ti okwa pandula ovanhu aveshe hava yandje ohonde shaashi oshe mu kwafela unene pefimbo eshi kwa li e li moshipangelo a pumbwa ohonde molutu, onghee okwa kala e na oumbada eshi a lombwelwa kutya okwa pumbwa ohonde eshi a kala teli pula ngeenge moshipangelo omuna tuu ohonde ya wana okuyandja.
Okwa hokolola ta ti eshi a fika moshipangelo okwa a twalwa komafano opo a ka minikelwa molutu nokonima ndokotola okwa mona kutya okwa pumbwa a ye koshitandelo shaashi okwa li a pumbwa okukonakonwa molutu.
“Konima eshi nda tandwa onda tulwa ohonde molutu shaashi ka kwali andi dulu okuenda ile okukala ofika onghee onda kala a shike andiyi etelele,” Uusiku ta hokolola.
Okwa ti konima eshi a tulwa ohonde molutu ina kale vali eudite ouyeyame molutu shaashi ope ya elunduluko lakula.
Onghee okwa ti okwa mona kutya mboli osho shili kutya ohonde ei hai yandwa kovanhu ohai dulu okuvatela ovanaudu moipangelo.
Okwa kunghulila oshiwana opo shi kale tashi ka yandja ohonde shaashi ohonde ohai kwafele ovanhu ve li momhumbwe unene tuu oomeme veli momateelelo, ovanhu va mona oiponga ile meme ngeenge ta pulumuna nosho tuu omikifi da yooloka. “Ovanhu nava kale tava topoelafana ouyelele kombinga yefimano lohonde opo ovanhu va kale ve na eudeko nohokwe yokukayandja ohonde,” Uusiku ta ti.