Tsandi - Ominista yoilonga noyeendifo John Mutorwa Etitano la dja ko okwa yeulula pambelewa oilonga yokuwapeka okapate komamanya kEpalela-Onesi opo ka ninge koteya.
Mutorwa okwa tumbula kutya, elalakano lokuwapeka opate oyo, okuyandja omauwa koitukulwa aishe yaNamibia.
Okwa ti kutya exumokomesho keshe moshitukulwa ole likolelela ashike keemhumbwe edi di li mo, unene edi di na oshilonga ngaashi eepate edi hadi longifwa efiku keshe.
Okapate oko oka kala po eedula 33.
“Exumokomesho keshe ngeenge tali ya ponhele ohatu landula omushangwalandu ou hau kala wa yelifa kutya, oshitukulwa shonhumba osha pumbwa opate ongomhumbwe yotete keemhumbwe adishe,” Mutorwa ta ti.
Ta ti nande ongaho, natango ove na okulandula nokutula moilonga etumbulo la tumbulilwe komupresidende kutya hamunhu a fyaala konima, ovanhu aveshe nava endele pamwe.
Ngoloneya woshitukulwa Erginus Endjala okwa ti, ovakwashiwana ova kala va teelela opate oyo i wapekwe efimbo lile, omo nokuli vamwe ova ka sholola.
Okwa twikila kutya ovakwashiwana ova kala hava longifa opate yomamanya ina omalambo amatutu oshoyo ondwi, eedula da fika po33, osho vati sha kala shihe fi shipu kuvo.
“Ovanhu ova kala hava kwata eevili dihapu ngeenge tava shingi mopate omolwoingwalungwalu, voo otava shingi va hala okukwatela po oyeendifo yavo. Paemhito dimwe eetuwa dihapu ohadi kala da humbata ovanaudu, ashike efimbo limwe ihava fiki pefimbo, voo ohava fiki va loloka voo otava ehama nale,” Endjala ta ti.
Okwa twikila kutya opate otai ka vatela yoo okuxupupaleka efimbo lomalweendo, unene tuu ngeenge ovanhu tava i koipangelo.
“Onde lineekela yoo kutya natango ei otai ka kala omhito iwa okuyandja oilonga kwaava ve na omhumbwe, naava ve na ounongo wokulonga eepate,” Endjala ta tumbula.
Okwa kunghilila yoo ava va pewa eetendela dokulonga opate kutya okwa teelela va longe noudiinini opo va mane moule wefimbo eli va pewa. Okwa weda po yoo kutya oilonga yavo nai kale i na ongushu, ndele voo inava hala oinima inai kola moshitukulwa shavo.