ONGWEDIVA - Pefimbo lopaife ovakainhu ohava fiilwa omitengi dokufila oshisho omaumbo shaashi ovalumenhu vavo otava ningi unene ovakaulinyanga.
Edi oda li da popiwa komupanguli womhangu yopedu Mwilima Mwilima pefimbo ta yandje efimbo lodolongo keembudi - ovalumhenu ve li vatatu ovo aveshe kwa didilikwa ovahomboli.
Ovalunga ava, Ruhumba Coetzee, Phillemon Johannes naLinus Iilonga ova hangikile noipa yongaka i li itatu, tai kosho N$150 000 mo2020. Mwilima okwa ti ounona vahapu ohava kulu va fa eefiye, no ihava mono ohole yawana lela molwooxe ve li meedolongo.
Okwa twikila kutya ovalunga ava ova kwatwa konima eshi va hangikile va londeka oipa yongaka motuwa. Ovalunga ava ova monikile ondjo momafiku 10 Aguste nova pewa keshe umwe eedula di li nhee opo va ka longele odolongo.
Umwe womovakainhu vovashamane ava vatatu okwa ti oshidjemo shoinima ei ovashamane hava ningi opo va konge ouxupilo efimbo limwe ohai kufa shihapu meenghalamwenyo davo osho yo dounona wavo.
Ta ti ounona wavo ohava kulu momidingonoko dii shaashi otava kulu tava tale voo tava udu oikulumuna ei ooxe va longa.
Okwa yelifa yoo kutya ohava kala tava xupu shokadila ngeenge ovashamane va dja po nohava longo noudjuu mokuwanifa po eemhumbwe dounona.
“Ounona vamwe ngeenge va i meengudu dopombada ohava kala va hala koufiya po ofikola shaashi vati ihava mono vali ouwa nefimano layo. Ohava lambalala eendjila da puka, ove omunhu eshi to pukulula vati omunhu okwa hala okulambalala eemhadi daxe,” umwe womuvo natango ta weda po.
Omuvalu wovakainhu hava fiwa tava lili omumwahodi molwavalumenhu vavo tava i meedolongo ile tava dipawa pefimbo lokulonga oilonga youlingilingi onghee tau londo.
Eshi otashi ulikwa komuvalu wovalumenhu vahapu ovo tava patelwa mo molwoimbuluma oyo tava longo. Omudo wa dja ko, Namibia okwa li e na ovanadolongo ve li 8 900 ovo eepelesenda ashike di li nhatu da fikama po movakainhu nosho yo ounona ve li koshi yomido 16.
Ovanadolongo ava ova kwatela mo ovanhu ve li 4 804 ovo natango havai keemhangu, oibofa yavo inai pwa, no 4 087 yaavo va pewa nale omahandukilo avo. Ovakainhu vovalumenhu vahapu ovo ve li mokalimosho ihava longo nohava filwa oshinakuwanifwa shokufila oshisho ounona shaashi okwa li va tala movashamane vavo.
taimihaihambo2000@gmail.com