ONDANGWA - Oilyo yeumbo lomutumba wopashiwana oye lipyakidila nokutalela po omandiki ouhaku noshoyo oipangelo monooli,  moitukulwa ya yooloka. Osheendo oshi kwetelwe komesho kuEphraim Nekongo.

Pefimbo a talela po endiki louhaku mOndangwa mEtivali, Nekongo okwa ti elalakano letalelepo lavo okuninga omapekapeko kombinga yomashongo a taalelwa koipangelo nokomandiki ouhaku.

"Otwa hala okudidilika omashongo a taalelwa koipangelo noshoyo okuuda omanyenyeto oshiwana. Onghee okudja opo ohatu a twala keumbo lopashiwana opo tu ka kundafane novaleli va yooloka nghee tu na okuyambidida oshiwana," Nekongo ta ti.

Nekongo okwa yelifa ta ti osha fimana ngeenge omanyenyeto oshiwana taa twalwa keumbo lomutumba wopashiwana.

Moshipopiwa shaye omupangi  pendiki louhaku laNdangwa Kredula Gervasius, okwa ti endiki lavo ola taalela omashongo ovanailonga ouhaku inaa wana.

"Otu na ashike ovapangi 12 neendokotola mbali. Okapangelo ohaka kala kehadi ovanhu va ngudumana  molwaashi inatu wana," ta ti. Gervansius okwa weda po ta ti okapangelo kavo oka taalela yoo vali omashongo a yooloka ngaashi onhele yetala lokukala ovanaudu pondje ngeenge ve li momukweyo, oushina vokukonakona ngeenge omukainhu oku na eteelelo nosho tuu.

"Otu na yoo oupyakadi wobesa yokutwala ovanaudu koshipangelo shakula," ta ti.

Lopokati opo ovanaudu va dja komikunda da yooloka ova nyenyeta tava ti ova lulilwa okukala momukweyo efimbo lile nokupangwa kwa toka.

Omukulupe weedula 75 Rebbeca Shikwaya a dile komukunda Okaku, okwa hokolola ta ti okwe ya kokapangelo efimbo longula potundi 08h00 ashike okwa ninga po eevili nhee ina pangwa.

Okwa indila ouministeli wouhaku opo u yandjaneke ovanailonga vouhaku va wana kendiki laNdangwa.

fhamalwa@nepc.com.na