Omupopiliko wouministeli woiyendifo neendjila Julius Ngwenda okwa ti ouministeli wavo otau ka landa eetuwa 32 dovanenenhu mepangelo.
Ngwenda kwa ti ouministeli owa tula poshitaafula oshimaliwa sheemilliona N$25 opo shi longifwe okulanda eetuwa depangelo.
Okwa yelifa ta ti eetuwa otadi kala di li mongalashe yepangelo da teelela okulongifwa ngeenge pe na omhumbwe yotuwa yokuhumbata ovafimanekwa. “Otwa didilika oshilongo sha taalela omhumbwe yeetuwa inadi wana okuhumbata ovafimanekwa.
Onghee naashi osha eta opo ouministeli u kale wa ongela oshimaliwa shokulanda eetuwa,” Ngwenda ta ti.
Onghee okwa ti oshimaliwa tashi ka landa eetuwa osha kala nokuongelwa efimbo lile moshikefa shouministeli wavo molwaashi osha fimana ngeenge epangelo li na eetuwa dovafimanekwa da wana.
Okwa ti eetuwa odo itadi ka pewa minista wonhumba ile omunapolitika ashike otadi kala di li mongalashe da teelelwa okulongifwa ngeenge pe na omhumbwe.
Okwa weda po ta ti kape na minista ile omunapolitika ta ka pitikwa a kale e na eetuwa odo keumbo laye molwaashi oda nuninwa omufinakenwa keshe a pumbwa osheendifo.
“Eetuwa otadi ka longifwa nawa opo di dule okulongifwa efimbo lile nokukwashipaleka kutya omaliko epangelo otaa kwatwa nawa,” ta ti.