Opolifi moshitukulwa shaMusati otai konakona efyo lokaana keemwedi nhee oko vati ka fya koshiungaungu konima eshi kwa li ka lyamininwa po kuina pefimbo va kofa monduda. 

Oshiningwanima osha ningwa momukunda Oshitunda moshikandjohololo shaShikuku oshivike sha dja ko lwopotundi 22h00. 

Nakufya okwa tongololwa oye Kagetuzu Erastus, okaana kokakadona. 

Omukulunhu koshikondo shokukonakona oimbuluma mopolifi mOmusati omupedu Commissioner Moses Simaho okwa hokolola ta ti ina yokaana efiku olo okwa dja keendingosho a kuminina okaana kaye. 

Otaku hokololwa kutya ina yokaana okwa li a kolwa pefimbo loshiningwanima molwaashi okwa uhala keendingosho pamwe nomushamane waye. 

Opolifi oya hokolola tai ti konima eshi xe yokaana a fika meumbo okudilila keendingosho okwa hanga nale omukulukadi waye nokaana va kofa ashike okwa lyaminina okaana. Ota hokololwa kutya xe yokaana okwa li okupendula omukulukadi waye te mu lombwele kutya okwa lyaminina okaana ashike okwa kofa e li mokati keemhofi. 

Okudja opo vati xe yokaana okwa ninga onghendabala opo a nane ko okaana koshi ashike oka hangika nale ka xulifa. 

Xe yokaana okwa shivifila opolifi nokonima olutu lokaana eshi la twalwa koshipangelo ova lombwelwa kutya okaana oka fya koshiungaungu. 

Ina yokaana ina kwatwa po nomakonakono opo otaa twikile moshikumungu omu. 

fhamalwa@nepc.com.na