OSHAKATI - Okamatyona keedula 16 ke na oudu wopamadilaadilo vati oka xulifila mosaala omo taku fekelwa kutya oka dengwa komunaudu mukwao. 

Oshiningwanima osha ningwa moshipangelo shaShakati Etitatu efimbo longula mosaala yovanhu ve na oudu wopamadilaadilo. 

Nakufya okwa tongololwa oye Karel Ya Ndakolo. 

Otaku hokololwa kutya okamatyona aka oka dalwa kungoloneya woshitukulwa shaShikoto Penda ya Ndakolo. 

Omupopiliko wopolifi moshitukulwa shaShana Inspector Thomas Aiyambo okwa hokolola ta ti opolifi moshitukulwa shaShana otai nigi omakonakono kombinga yefyo lokamatyona Ndakolo. 

Opolifi oya hokolola tai ti otaku fekelwa kutya Ndakolo pamwe okwa xulifa eshi a dengwa komunaudu mukwao womulumenhu oo kwa li ve li naye mosaala imwe. 

Omulumenhu oo oku na omido 30, ye vati okwa nyika oshiponga shaashi oha denge vakwao mosaala nokukala ta kondjo novapangi. 

Otaku hokololwa kutya umwe womupangi okwa hanga omunaudu umwepo a londa medimo laNdakolo pefimbo a nangala pedu. 

“Ovapangi ova kala nokukondjifa okukufa mo omulumenhu ou masala fiyo tave shi pondola. Nokudja opo omulumenhu ou okwa ka patelwa mondudu ye likalekelwa shaashi okwa nyika oshiponga,” Aiyambo ta hokolola. 

Okwa ti okudja opo eshi eendokotola da ka fika onda hanga nale Ndakolo a xulifa. 

Eshi a kwatafana naKundana Penda ya Ndakolo ou e li xe yokamatyona aka okwa ti okwa tambula ko oshikumungu eshi molwaashi sha longwa osha pwa nale. 

Onghee okwa ti ke na kutya ota ningi po shike. 

“Inandi hala oku ya oilonga yopolifi moshipala onghee opolifi nai twikile nokuninga omakonakono ayo,” ta ti. 

Lwopokati opo, ngoloneya okwa ti okwa hangika ashike e li meefya daxekulu a xulifa oshivike sha dja ko. “Konima ngeenge otwa pake tatekulu ohatu ningi natango omalongekido epako lokaana kange,” ta ti. fhamalwa@nepc.com.na