Omukulunhuwiliki wouhaku moshitukulwa shaShikoto Josua Nghipangelwa okwa ti okombifa yokutelekela moshipangelo shaNandjokwe otai ka longululwa molwashi oya kulupa.
Okwa ti ovanailonga paife ohava longo noudjuu ngeenge tava teleke molwashi mokombifa omwa kulupa nekuma ola tenda noshoyo pedu opwa ninga omalambo.
Onghee okwa yelifa ta ti oshi li eshongo linene la taalelwa kovanailonga vokekulo moshipangelo shaashi ihava longo momudingonoko uli nawa.
“Ovanailonga paife ohava kala va tila nokuwilwa kekuma shaashi lakulupa,” Nghipangelwa ta ti.
Meenghundafana a ninga naKundana oshivike sha dja ko Nghipangelwa okwa hokolola ta ti oshipangelo shaNandjokwe osho shimwe shomoipangelo ya tungwa pefimbo loita.
“Omatungo paife okwa kulupa molwashi okwa tungwa omido 33 manga Namibia ina manguluka, onghee osha fimana opo tu kale twa longululwa okombifa,” Nghipangelwa ta ti.
Nghipangelwa okwa weda po ta ti itashi ulike efano liwa ngeenge oikulya tai telekelwa monhele ya kulupa muna nombwi tai pedu.
“Ovanaudu ova pumbwa okulya oikulya ya koshoka ya telekelwa monhele ya yela nawa,” ta ti.
Okwa ti ombelewa yaye oya kwatafana neembelewa da kula douministeli wouhaku opo di kale da longekida oshimaliwa shokulongulula okombifa.
“Onda lombwelwa kouministeli wetu opo ndi kale nda ninga omapekapeko kombinga nghene okombifa ina okulongululwa. Onghee ohandi ka shivifila ouministeli konima ngeenge da mane nomapekepeko,” ta ti.
Okwa weda po ta ti epangelo ota li twikile nokuyambidida oshikondo shouhaku noikwafifo ya pumbiwa koipangelo nokomandiki ouhaku.