ONGWEDIVA - Leena David omunamido 78 okwa ti yee okwa tameka okuhonga oiuma mo 1982 fiyo onena.

David okwa tumbula kutya yee onghalamwenyo yaye aishe inalonga pamwe pe lili, nonande a kala e na oshinakuwanifa shakula komapepe aye shokufila ounona vaye oshisho.

Okwa twikila kutya eedula adishe odo okwa kala ashike ha me eembiya dedu nokonima ova ka ninga elao eshi va ka mona edeulo lokuma omadu mo 1999. Modula omo tuu omo Ovandowishi ove va talifa omadu a yooloka aa taa dulu okuma oiuma moshilongo ashishe.

“Eshi osha kala shiwa kwaame neenghono shaashi natango ofye twa li twotete twa longwa okuveeka oshoyo okufaneka oiuma nekwangha,” David ta ti.

Okwa twikila kutya konima eshi a mona edeulo lokulonga oiuma oshe mu pa omhito opo a nenepeke ounongo waye wokuhonga oiuma. Konima eshi ounongo waye wa nenepekwa kOvandowishi okwa ka tameka ta hongo oiuma iwa yomaludi a yooloka nongeshefa yaye oya tameka okukula.

“Onda kala yoo handi longo ovanhu okuma oiuma moitukulwa aishe i li ine yokonooli moshilongo ashishe. 

Vakwetu vahapu ava nda longa ovakulupe ve li meedula omi-70 fiyo omi-80 ndele fiyo onena otava hongo voo tava landifa,” David ta twikile.

Okwa ti oha taalele yoo omashongo unene ngaashi ovanhu hava kufa po oiuma yaye keendjo ndele tava kala inava hala okufuta.

Okwa ti yoo ota indile ovanyasha ava ve litula mongeshefa yokulandifa po omalutu avo va tameke okukonga oilonga i li xwepo ngaashi okuhonga nande oiuma. 

Ohandi deula yoo ovanyasha vahapu okulonga oilonga yoludi eli ndele paife ove na ashike oilonga yavo ya ukilila. 

Onda hala ovanyasha ava va konge oilonga ya yooloka noya nyika ouyuuki shaashi Namibia oku hadi eemhito dihapu doilonga.