“Nonande owa tala ndje nda tsima, nda zala iikutu inaayi dhengwa oshikangule, nezimba itaali hokitha, ihandi lala nondjala,” Omulandithi gwiihulunde ta ningi omashendjo ngaaka.

Maria Johannes ngoka ha landitha iiyimati niihulunde komeho goWoermann Brock mOshakati, okwa ti oha menaka ongula onene opo a tentene ookasitoma dhongula. 

“Okamaliwa kandje hoka handi mono mesiku ohaka kwathele ndje okulanda iikulya. Onda thikama momutenya oshoka inandi hala okuhehela aantu, oshowo okuguma iinima yaantu,” ta popi ngaaka. Ta ti, ina hala okunyenga iinima yaantu, oshoka ota mangwa po, ye athige oluvalo lwe momapandaanda.

Johannes ta ti, oyendji ye li moondholongo oya yaka iinima yaantu omolwondjala noluhepo.

“Ngele ou na ongeshefa yoye, to kondjitha okumona N$10 oto gwanitha ashike okulanda omboloto nosuuka, e to nu otee,” ta ti ngaaka.

Ta gwedha po ta ti, nonando omasiku gamwe ohaga piti ko kaaku na ookasitoma, ihashi mu shololitha oshoka ngula Pamba ote li sile oshimpwiyu.

“Oshimaliwa kashi na olwaala, ngele okwa tiwa natu ye kongeleka atuhe otatu umbu ashike ongalo, nongele okwa tiwa natu yeni koshituthi shontumba, atuheni otatu zaleni owala omizalo omiwanawa,” ta popi ye ta imemeha.

Johannes okwa kumagidha aanyasha aakwawo ya thangele omutumba noluhepo kokule. 

Ta ti, ngele owa shuwa nkene oshimaliwa hashi kongwa nena ku na esiku wu se ondjala.

“Ihandi ndhilaadhila noku ka konga iilonga yilwe oshoka ngame omunangeshefa kungame mwene. Omimvo ntano komeho oto adhandje ndi na etungo lyi thike mpoka,” ta ulike ositola yili komeho geye tayolo.

Ta kumagidha oshigwana ta ti, okunyangandhala oku vule okumwena.

Ta ti, ondjala oyi na olungwenye, oyendji yaana ombili –oluhepo! oshoka omaundhigu ogendji ihe kaye na nkene yega kandulepo.

“Ngame uuna ndi na shandje shokulya, ondili nawa, kandi na esiku ndi hulithe po okukangandhala,’’ ta popi ngaaka.

Johannes ta ti, oshigwana nashi kale hashi yambindhindha aalandithi yomomapandaanda, opo wo nayo ya mone sha sho kulya.

– vkaapanda@nepc.com.na