EHAFO LYAKANDENGE-Aaluhe ngele taku ningwa iituthi yontumbo yehafo, ngaashi oohango, omavalo, omashasho no sho tuu, Aawambo ohaya hanga omalovu giilya, onga omuthigululwakalo.

Martha Nathanael gwomimvo 45 momukunda Ehafo Lyakandenge moshikandjohogololo shUvudhiya, okwa li uulike nkene ta hanga omalovu giilya, noku fatulula esimano galyo.

“Moshiwambo omalovu giilya iha shi shiwa ga kale kaagemo moshituthi shontumba. Omanga iikunwa yopailumbu inaayi thika mo muka, otwa kala hatu kutha po enota niikunwa yetu yoshiwambo,” ta fatulula ngaaka.

Ta ti, oyena iikunwa ya yooloka ngaashi, oontaku, omalunga, omagongo, oshinwa niikwawo oyindji haye yi eta po yoye ne.

“Omalavu giilya ogena omulandu nkene haga ndhungwa, nongele owuna omutse omukukutu, ito ga ndhungu, “ta popi ye ta imemeha.

Ta popi ta ti, osha simana ngele oshigwana tashi tsikile okugwanitha po nokusimaneka omuthigululwakalo, oshoka ogo omulilo goshilongo.

 Okwa hokolola nkene aantu taya kanitha eyitaalo lyomuthigululwakalo omolwo ontseyo kaaye na kutya ogwa simana.

 “Inamu dhina shoka mwa adha ko nale, ngele taku popiwa kutya, ‘pamuthigululwakalo’ simaneka shoka tashi popiwa,” ta popi ngaaka.

Ta popi ta ti, muuyuni muka tuli mo, kamu na nando ogumwe e na uuthemba okudhina nokuteya gula po omuthigulwakalo. 

Aantu oye na omithigululwakalo dha yooloka nonando yimwe yomuyo ya faathana.

Nathanael okwa kumagitha aanyasha ya tameke okwiilonga shoka yaashi kombinga yomuthigululwakalo, opo ya vule okukalonga aanona yawo monakuyiwa, opo kaagu se.

“Oshinakugwanithwa shetu mbaka tuli ko sigo opaife, tu longe aanona yetu, oshoka ngele otwa mwena, omuthigululwakalo otagu huulile mu se, no ngele otwaka  kana ko atuhe, nago otagu hulu ko,” ta fatulula ngaaka.

Ta gwedhapo ta ti, oyendji otaya iipula kutya oshike iiningwanima yi nyanyaleka tayi holoka, ihe muuyuni wo nale ka yali hayi ningwa, shi shiweni kutya, ayihe otayi ningwa omolwa omulilo goshilongo ngoka itaagu simanekwa we. 

vkaapanda@nepc.com.na