Aaleli aakuluntu yiilongo iyali Angola naNamibia, oya yi mo mutumba gwopambili Omandaaha moka ya li ya kundathana omaupyakandhi nomauwananwa ga yama kiilongo ayihe iyali, oshowo nkene ye na okutsikila okulongela kumwe noku kaleka po ombili.

Omupeviprima Netumbo Nandi-Ndaitwah naminista gomakwatathana gokondje koAngola Tete Antonio, oya li ya yi moonkundathana ngaashi ya pewa omapitikilo kaaleli yiilongo yawo, nokukundathana omaupyakandhi ga yooloka ngaashi okulitha iimuna moAngola shaa li paveta.

Aanamibia yamwe oya ningi oohambo dhawo meni lyAngola omolwondjala ndjoka ya taalela iimuna moshilongo.

Aanafaalama yiimuna yaaNamibia ya tembukile moAngola oya li ya tseyithilwa kutya otaya tembundhwa mo, shoka kwa li sha etitha oshigongi shika.

“Omapangelo ngaka gaali otaga gwanitha po nokusimaneka omilandu dha tulwa po pokati kiilongo mbika iyali Namibia nAngola, onkene otaku tseyithulululwa kutya Aanamibia oya manguluka okuya moAngola ngaashi sha kala, shampa ashike taya gwanitha po nokusimaneka oompango dhoshilongo shAngola,” ombapila  ya pitithwa kepangelo lyAngola ya lesha ngaaka.

Oya shanga kutya oye na ontseyo kombinga yuupyakadhi wa taalela aanafaalama yaaNamibia, ihe otaya indile nesimaneko kehe ngoka a pita nokudhika iigunda yawo yiimuna kaashi li paveta nopalandulathano dhomisindalandu, opo ya tambuke po.

Epangelo lyAngola olya tsikile okunyola kutya okamusindalandu hoka ka kala po kombinga yekwatathano lyAngola naNamibia oke li miilonga natango, onkene nakasimanekwe. 

“Moka mwa kwatelwa kutya, Aanamibia oya manguluka ashike okukala moAngola ookilometa inaadhi pita 60,” ya shanga ngaaka.

Nandi-Ndaitwah okwa li a pandula epangelo lyAngola sho lya pitike Aanamibia ya konge uulithilo moshilongo shawo, omolwondjala yiimuna ndjoka ya etithwa kelundululoko lyonkalo yombepo.

“Shika osha ningwa omolwonkalo yuumwayinathana oshowo ombili pokati kiilongo mbika iyali. Ombepo ndjika yuumwayinathana otayi tsikile opo iilongo mbika iyali yi hume komeho omolwuukumwe,” ta pandula ngaaka.

Omapangelo ngoka gaali okwa li ga tsu kumwe okutalela po aakwashigwana miilongo yawo, oku ya tseyithila esimano lyelongelokumwe pokati kiilongo mbika iyali.

vkaapanda@nepc.com.na