Max Henrich
ONGWEDIVA - Omauliko opaipindi mOndangwa aa a ningile efimbo a pata molwaCorona virus, paife okwa patuluka. Okwa kundanekwa kutya omauliko aa okwa ninga oule weedula nhatu a patela ovakwashiwana pondje.
Eyuululo pambelewa olo la ningwa onghela olo etimulongo okudja nghee omaulikilo oipindi a patuluka oshikando shotete mOndangwa. Noneudo momauliko opaipindi aNdangwa omu na outala vomalandifilo va konda 200. Elelodoolopa laNdangwa ola kundaneka kutya otali kendabala okuninga keshe osho tali dulu opo li dule okutwa omukumo oshiwana opo shi twikile nokukufa ombinga momauliko opaipindi mOndangwa.
Minista woikwameni Lucia Iipumbu okwa ti omauliko opaipindi aa ohaa nane ovanailongo ovo navo yoo hava kufa ombinga. Okwa weda po yoo kutya ovakufimbinga momauliko opaipindi ohava kufa ombinga mokuyambidida meliko loshilongo voo natango ohava yandje eemhito doilonga kovakainhu novanyasha.
Epangelo nalo ohali yambidida ngee tali kufa ombinga momauliko opaipindi aa ngee tali ningi eepologalama dalo oshoyo okutwa ovakwashiwana omukumo. “Natango shihapu osha pumbwa okuningwa ngee tashi ya pexumokomesho lomauliko oipindi mokunenepeka eengeshefa dopedu oshoyo dakula,” Iipumbu ta tumbula.
Ovakufimbinga aveshe nava tameka okulongela kumwe ndele tava kongo ondungedilaadilo nghee ve na okukulika eengeshefa davo.
Jackson Amutenya oo e li omukufimbinga momauliko opaipindi okwa kundaneka kutya yee opo te litoto okukufa ombinga mongeshefa ya tya ngaha. Okwa tumbula kutya ocorona okwa li ya shunifa omangeshefelo pedu. Ta ti shito oha kufa ombinga momauliko opaipindi oo haa kala moWindhoek novanhu vahapu ohava kala lela tava yambidida shaashi oshilandopangelo ohashi kala shi yadi lela. “Ashike nande ongaho ondi na omukumo kutya oshi na ashike okweenda nawa,” Amutenya ta tumbula.
Minista okwa kunghilila ovakufimbinga momauliko opaipindi aa va longele kumwe novakufimbinga vakwao avashe opo va dule okunana ovakwashiwana vomoitulukulwa ya yooloka unene tuu ovo tava dulu okukufa ombinga mokuveetela ounongo upe.
Iipumbu okwa pandula elelodoolopa laNdangwa moshiningwanima sha tya ngaha oshoyo ombelewa ya yakansela mokufya oshisho kutya oshingwanima sha tya ngaha natango otashi pula komesho.