Elelo lyOndoolopa Oniipa melongelokumwe naanangeshefa mondoolopa ndjika otaya ka longekidha omauliko gotango gopaipindi okuthika pehulilo lyomwedhi Sepetemba. Omauliko giipindi ngoka taga ka kala ge na sha nomithigululwakalo otaga ka tameka momasiku 28 gaSepetemba sigo 02 Kotomba nuumvo.

Minista gomauyelele Peya Mushelenga esiku ndyoka okwa li a popi kutya omauliko giipindi ohaga humitha komeho eliko lyoshimaliwa moondoolopa.

‘’Ndika edhiladhilo ewanawa, ndyoka tali ka humitha komeho ondoloolopa yOniipa oshowo eliko,’’ ta fatulula ngaaka. Ta ti, omauliko giipindi otaga ka hila wo natango aatalelipo okuza koombinga noombinga dhoshilongo oshowo kondje yoshilongo. “Eliko mondoolopa muka itali ka kala we lya fathana , ihe otali ka koka, oshoka oyendji otaya ka tondokela mondoolopa muka,” ta popi ngaaka. Mayola gondoolopa gOniipa Hileni Idhogela okwa popi ta ti, muule womimvo tadhi ya elelo lyondoolopa lyOniipa otali ka ninga Ondoolopa onene.

“Omauliko giipindi ngoka tatu longekidha  otaga ka kala ondjokonona ya simana kelelo lyondoolopa lyOniipa oshowo koshigwana nokaanangeshefa yomoshitopolwa shetu,” ta ti ngaaka.

Elelo lyondoolopa olya hangana naanyasha taya longekidha nokuwilika omauliko gwotango gopaipindi gOniipa. Omukwatelikomeho gomauliko giipindi Actophery Lucky Kwedhi okwa ti, elelo lyondoolopa pamwe nayo oye shi koneke kutya ondoolopa opo yi hume komeho nokuhwepopaleka uuhupilo waakalimo ayehe, oye na okulongela kumwe nokukutha ko iinima ya guma omapendulepo miikaha yawo yene nokwaadha omalalakano gontumba. 

Okupitila momauliko giipindi ngoka gopamuthigululwakalo, momasindano ogendji otaga vulu oku adhika shi vulithe okulonga muuwike. 

“Shika osho sha etitha elelo lyondoolopa tu longele kumwe noku eta po edhiladhilo shoka tashi ka tseyika nedhina Oniipa Cultural Tourism,” ta ti ngaaka.

Omauwuliko giipindi ngoka otaga ka ka kala ge na ashihe oshigwana tashi ka pumbiwa, okuza kiikulya, kiikunwa oshowo iizalomwa.

Kehe ngoka taka kala e na uuyelele kombinga yomauliko giipindi ngaka na dhenge konomola 081 127 1207. -vkaapanda@nepc.com.na