OSHAKATI - Ombaanga onene, Bank of Namibia oya gongaleke aatoolinkundana monooli oku ya fatulila iilonga yawo moshilongo.
Aatolinkundana yathika po12 ya za kiikundaneki ya yooloka ngaaashi koNew Era, NBC, Ministry of Information Communication and Technology, Omulunga Radio, Informante, The Namibian Sun oshowo Omutumwa okwa li ya kutha ombinga.
Omalongo ngoka oga tameke Etiyali notaga hulu nena.
Omukukwatakanithi gomauyelele mOmbaanga onene yoshilongo Kazembire Zemburuka okwa li a fatulula kutya omalongo ngoka oga longekidhwa nelalakano lyokuuvithako aatoolinkundana kombinga yoshimaliwa oshowo ombaanga onene nkene hayi longo moshilongo.
“Shika otashi gandja ontseyo uuna taya lopota kombinga yoombanga nenge yiimaliwa, oshowo okufala uuyelele moshigwana,” ta fatulula ngaaka
Reinhold Kamati ngoka a li a kwatele komeho omalongo ngoka okwa li a fatulula esimano lyombaanga onene yaNamibia.
Ta ti Ombaanga ndjika oyo he yoombaanga andhihe moshilongo.
“Ombaanga ndjika oyo hayi andjanekele oombanga adhihe oshimaliwa, otse hatu dhi kondololo opo dhi kale dhi li momulandu gokulonga oshowo okugwanitha po omayakulo gawo agehe,” ta popi ngaaka.
Ta ti, ombaanga ndjika natango oyo hayi kondolola shoka shi na okuningwa naashoka kaashi na okuningwa.
Kamati okwa fatulula oongamba dhawo okweeta po iimaliwa oyindji moshilongo, shoka hashi ngushupaleke oshimaliwa, a gandja oshiholelwa shiilongo yimwe.
“Oshimaliwa oshindji ohashi thiki ponkatu yokungushulula oshimaliwa, to ki iyadha wu na oshako yiimaliwa tayi landa oshinima shimwe ashike,” ta ti ngaaka.
Karin Elago ngoka a li ta gandja omalongo esiku ndyoka okwa li a kumagidha kombinga yiimaliwa hayi kana koombaanga.
Okwa fatulula wo kombinga yiimaliwa hayi mbaangwa moombanga.
“Ope na omilandu ndhoka hadhi landulwa opo ehangano lyontumba lyi kale tali pungula moombaanga moshilongo,” ta fatulula ngaaka.
Ta ti oshigwana oshi na okutseya kutya omahangano ashike gomoNamibia ga pitikwa okupungula moombaanga moka.
Sho oshoka to adha aantu taya kanitha iimaliwa yawo okupitila mooprogalama dha totwa po ndhoka dhokugongela iimaliwa.
“Stokvel ehangano lya pitikwa, ihe ope na gamwe ngoka taga longo kaashi li pamulandu. Mboka haya kanitha iimaliwa yawo momukalo ngoka, ope na natango omilandu opo mboka ya kanitha iimaliwa yawo ye yi pewe,” ta popi ngaaka.
Okwa popi wo kutya ombaanga onene oy ina oshimpwiyu shokufutila oombanga oonshona uuna dha kana po, opo aantu mboka ya li haya pungula nayo ya mone iimaliwa yawo.vkaapanda@nepc.com.na