Ominista yehongo lopombada Itah Kandjii- Murangi okwa ti osha fimana ngeenge ovanafikola tava di momihadjo shaashi otashi va pe omhito ve li honge nawa nokukala tava di momudingonoko uhe na omawelelo. 

Okwa ti ouministeli waye otau lalakanena okukala wa tungila ovanafikola ve li koipupudilo yopombada omihadjafikola dihapu. 

Kandjii Murangi edi okwe di popya pefimbo kwa li ta patulula omuhadjo koshipupudilo shaUNAM, Eduardo dos Santos mOngwediva Etitatu. 

Minista okwa ti omuhadjo owa tungwa u una eembete dokunangala 256. 

Okwa ti monduda keshe ota mu ka kala muna ovanafikola va vavali noshoyo oitaafula yoku li hongela. 

“Ovanafikola nava kaleke po omuhadjo wa yela efimbo keshe noshoyo okukwata nawa oikwafifo yomomuhadjo ngaashi eembete noupomba vomeva,” ta ti. 

Okwa ti okwa didilikwa ovanafikola koshipupudilo UNAM va kala va taalela eshongo linene lomuhadjo, omanga vamwe hava ende eendjiladiledile ngeenge tava i keetundi. 

Ovanafikola vamwe ohava di meehiila molwaashi mofikola yavo ina mu kala muna omuhadjo. 

Moshipopiwa shaye ngoloneya woshitukulwa shaShana Elia Irimari okwa ti omuhadjo otau ka eta elunduluko la kula movanafikola molwashi ovanafikola vahapu itava ka kala vali ve li momhumbwe yeenhele dokudja. 

Onghee okwa ti eshi otashi tu ovanafikola omukumo opo ve li honge nondjungu notashi eta oidjemo iwa kexulilo lomudo. 

Okwa weda po ta ti omalelo eedolopa na a kale ta yandje omadu koipupudilo yopombada ile keefikola opo i tungilwe omihadjo 

fhamalwa@nepc.com.na