Ovakalimo vopomikunda da dingonoka Oshalumbu ohava ende oshinano shile tava ka konga omeva kopomba ili mOshalumbu.
Ovakwashiwana ava vamwe ohava ende oinano ili pokati keekilometa 40 okuya nokudja kopomba oyo.
Omunhumbwe yomeva oyo unene ili eshongo linene komikunda dili moshikandjohoololo shaKongo.
Edi oda popiwa kumwene womukunda Oshalumbu Simon Moses pefimbo kwa li ta popi kofikola Oshamukweni Etitatu.
Moses okwa ti otai indile kepangelo opo li tule po eemboola domeva da wana momikunda da dingonoka Oshalumbu shaashi paife oshiwana otashi mono oixuna.
“Omafimbo amwa oto hange popomba pe yadi oshiwana sha ngudumana efimbo lile sheuya okuteka,” Moses ta ti.
Okwa ti shaashi omboola ohai longo kokashina komahooli efimbo limwe ohaapu mo ndele okapomba taka kala ita ka longo.
Onghee okwa hokolola ta ti ngeenge okashina ka pwa omahooli ovakalimo novanafikola ohava kala ashike tava dengwa kenota. “Opomba yetu oina ominino dishona onghee iha tu dulu okukufa mo ominino deepomba detu dokutula momaumbo,” Moses ta hokolola.
Pefimbo Kundana a talela po opomba Etitatu opo hapa teke ovakwashiwana, ova hokola tava ti vamwe vati ohava ende oshinano 40 okuya nokudja popomba.
Simon Thomas omukalimo wokumunda Onehanga nokwa hokolola ta ti oha ende oshinano 30 km ngeenge teu ya noku shuna keumbo. “Omafimbo amwe a ohatu teke momifima shaashi opomba oili kokule unene,” Thomas ta hokolola.
Okwa ti ohava xwiile yoo noimuna yavo popomba opo shaashi kape na omatale okunwefa oimuna.
Hafyenanye Petrus okuli omikalimo womukunda Oshalumbu, okwa ti ovakulupe ovo unene oihakanwa yokudengwa kenota shaashi ihava dulu okufika kopomba.
“Oomeme ve li momateeelo navo ohava ende endjila diledile okudja komikunda da yookoka tave uya okuteka popomba opo,” Thomas ta hokolola.
Okwa weda po ta ti eendungu dimwe odi na omeva omalula no itaa dulu okunuwa kovanhu.
Omunashipundi welelo moshitukulwa Ohangwena Erickson Ndawanifwa okwa ti enota olo unene la didilikwa tali dana onghandangala komikunda dihapu dili moshikandjohoololo shaKongo.
Ndawanifwa ou eli yoo kansela woshikandjohoololo Omulonga Okwa ti elelo lomOhangwena okwa li la ninga eenghendabala dokutungila ovakwashiwana eembola ashike ina di wanena omikunda adishe. “Ohandi ka kwatafano nakansela waKongo noshoyo ovanambelewa ve nashi nokuninga omafaneko okuyandjaneka omayakulo moshitukulwa opo tu kundafane nghee tuna okukandula po omukundu womeva,” Ndawanifwa ta ti.