Ehangano lyokwaandjaneka omawi mombepo (MTC) olya ti natango kali na uuyelele wothaathaa ngele omasiku gahugunina gokushangitha uukalata otaga ka gwedhelwa.

Oshigwana osha kala nokutseyithilwa opo shi kale sha shangitha uukalata washo omanga omasiku 31 gaDesemba inaaga thika.

Omugandjigomauyelele mehangano lyo-MTC Erasmus Nekundi okwa ti, nonando ethaneko lyokugwedhela omasiku ngoka opo lyi li, oye na okupewa epitikilo okuza kehangano lyomakwatathano lyoCommunication Regulatory Authority of Namibia (CRAN) opo ye shi ninge.

“Otwa ndhindhilike natango kutya aantu oyendji inaya shangitha uukalata wawo, ashike otu na okwiiyutha koompango, sigo Cran a tokola ngele ota gwedha ko komasiku nenge aawo,” ta popi ngaaka.

Ta ti, sigo oompaka esiku lyahugunina ndyoka lya kala po nolyi li po31 yaDesemba nuumvo.

Ta gwedha po kutya oya kala nokutseyithilwa omanyenyeto kombinga yomikweyo omile ndhoka tadhi shololitha aantu, ihe ehangano itali vulu okuya po nomukalo gopautekenika, okukwathela okushangitha uukalata woongodhi komadhina gooyene, oshoka ohashi pula omanyala.

Nekundi okwa ti, nonando shoka itashi vulu okuningwa, otaya tsikile okulonga nuudhiginini nelalakano lyokushonopaleka omikweyo omileeleka, ndhoka tadhi nyenyetwa koshigwana.

Oshigwana okuza omumvo gwa yi osha kala nokunyenyeta omikweyo ndhoka omileeleka.

Selma Naftal ngoka a li e li momukweyo goku ka shangitha okakalata ke mOshakati okwa ti oye na ohokwe nehalo lyokushangitha uukalata wawo ihe omikweyo omile noonkondo.

“Ohatu kala tu na iinakugwanithwa yilwe, ihe mpaka ngele owe ya po ito zi po we mbala. Aaniilonga nayo otaya ende kashona,” ta nyenyeta ngaaka.

Omulumentu ngoka naye kwa li e li momukweyo moka, okwa nyenyeta ethimbo a kala po, ta ti omukweyo otagu ende kashona.

“Onde ya po nale po11h00, ihe paife o13h00. Tse yamwe otwi iyaka ko kiilonga, oto mono ashike ombali ya dhenga inaatu yakulwa,” ta ti ngaaka.

Kundana sho a ningi omapekaapeko, okwa mono nkene omikweyo ndhoka omile noonkondo noyendji ohaya shuna inaaya yakulwa sho ya sholola, omolwiinakugwanithwa yilwe.

MTC okwa eta po omukalo gokushangitha uukalata woonomola komadhina gooyene omumvo gwa zi ko muJuni. 

Omukuluntu gwehangano lyo-MTC Tim Ekandjo okwa ti omayishangitho ngoka otaga yi sigo onuumvo muDesemba.

“Shika otatu shi ningi omolwomakengelelo gaafuthi uuna taya longitha omukalo gopangodhi okuyuga oshigwana iimaliwa nosho tuu,” ta fatulula ngaaka.

Ekandjo ta ti, ota indile oshigwana opo shi longithe ethimbo ndika lya hupu ko okunyolitha uukalata wawo, opo kehe gumwe a kale e na okakalata ke na omaukwatya ge.

Okwa tengenekwa ookasitoma dhehangano ndika lyo-MTC dhi vule poomilliona mbali dhi kale dha ishangitha. 

“Otwa longekidha ethimbo ndika tango lyi longithwe omanga ndyoka tali ka dhengela inaali thikana kehulilo lyomumvo nguka,” ta popi ngaaka. 

Ekandjo ta ti, omayishangitho oge li momahala ga-MTC oshilongo ashihe, miitopolwa ayihe 14.

Omayishangitho ngoka otaga ningwa oshali itaapa pulwa nando ondando yoshimaliwa. 

vkaapanda@nepc.com.na