OSHAKATI- Uuna omukiintu gwOmuwambo ta hokanwa, olwindji oha zalekwa tango iikutu yoshiwambo omanga esiku lyohango inaali thika.

Onha zalekwa iikutu ngaashi ondhelela, onyoka, iikatha niikwawo oyindji, mbyoka tayi opalele komuzalo ngoka goshiwambo a zala.

Maria Nasipiri ngoka e li mo matala gaShakati ta landitha iinima yoshiwambo okuza kiizalomwa sigo okiikulya nokiilongitha okwa ti, kehe ngoka ta longekindha oshituthi kehe, tashi pula iizalomwa nenge iilongitho yoshiwambo ina pumbwa okulonga nuundhigu.

“Kehe shoka wa tala shi li mpaka sho shiwambo oshina oshilonga, unene pamuthigululwakalo goshiwambo, ihe gumwe oteshi uvu ko ashike uuna teke shi longitha,” ta fatulula ngaaka.

Ta gwedhapo ta ti, iilandithomwa ye mbyoka oyo hayi mu pe oshimaliwa shoku yambidhidha aakwanezimo ye oshowo okugwanitha po oompumbwe ndhilwe.

Ta ti, iinima oyindji oye mwene heyi eta po noonyala dhe, ngaashi oonyoka, omawe gwokoondhelela, oompamba ,na ayihe yi li po katala ke mpoka.

“Iilonga mbinga ohayi pula oonkondo ndho muntu, no ngele owa hala okuya komeho, owu na oku kala wiitula mo, ihoosholola, oshoka ha kehesiku ookasitoma handhi ende,” ta popi ngaaka.

Ta ti, ongeshefa ye oyina omathimbo, opena ethimbo ookasitoma tadhi ende ethimbo alihe , unene ethimbo lyoohango, oshoka oyendji ohaya kala ya hala iinima yoshiwambo, taga ndja oshiholelwa shomagonga.

Ta fatulula kutya, opena natango esiku ta li piti ko inaa mona nando okasitoma yimwe, ihe shoka ihashi mu shololitha nando, oshoka ye okuna eyindhindhimiko oshowo ontseyo ya gwana mongeshefa ye.

“Omutumba ka guna sho hagu eta, ngele onda kala ndili megumbo kaandina shoka te longo, olye ta pendje sha sho kulya, ngame inandi thika moomvula ndho ku pewa penzela,” ta popi ngaaka.

Okwa po pi wo kutya, nonando aashingithi akwawo ohaya kutha oombinga mo mauliko giipindi haga holoka, iha thigi po ehala lye mo matala oshoka okwa itaala kutya ookasitoma natango otandhi ya ashike.

Lovisa Nepembe naye ha ende mo mapandaanda  ta landitha iinima yoshiwambo okwa ti, ongeshefa ye otayi ende nawa.

“Onda li handi landitha uukuki noohi tango, ihe paife onda tembukila mongeshefa ndyika oshoka otayi endelele shi vulithe ukuki,” ta popi ngaaka.

Ta ti, oshikatha shimwe otashi pula nale N$600, ndyoka ha mona pethimbo limwe, shi vulithe okugongela N$2.

Ta popi ta ti, aanamibia oyena omagano niitalendi yoku eta po iinima noonyalo ndhawo, ihe kaye yi longitha, nonando taya nyenyeta ondjala.

“Ngame itandi si ondjala, nonando inandi longwa, okulongwa hako iilonga, ihe oondunge ondho handhi etele omuntu uuyumba,” ta  ti.