Home / Ompumbwe yAanawino Oyi Li Endangalati kOmapendulopo Ompumbwe yAanawino Oyi Li Endangalati kOmapendulopo
"WALVIS BAY Namibia okwa taalelwa komukundu omunene gwompumbwe yaaniilonga kaa ye na owino nontseyo unene miimpungu yopautekenika, naashika osha talika ko endangalati enene kiiyetwapo yomapendulopo moshilongo. Ngaka omadhiladhilo gwopamuhanga ngoka ga hololwa kongundu yaanangeshefa mOmbaye mboka ya tsakanene nOmupresidende Hifikepunye Pohamba oshiwike sha zi ko pomutumba gwetopolelathano lyomauyelele. Aakalelipo oyendji ya za miimpungu iinene yopangeshefa dhopaumwene mboka ya gongala mpoka oya tseyithile Omupresidende Pohamba kutya ompumbwe yaaniilonga ya konkolekeka/longekeka ohashi ya pula iimaliwa oyindji nohashi etitha wo Omathaneko gOmapendulopo gOpashigwana nOndungethaneko yOmumvo 2030 yi ende kashona. Aanangeshefa oye shi ulike kutya onkalo ndjika ohayi ya thiminike oku ka konga aaniilonga ye na ontseyo okuza kiilongo yilwe, shoka hashi kutha po oompito dhAanamibia. Otaya ti okweeta aaniilonga mbaka kashi na ashike ondilo ihe oshi li wo omukalo hagu kwata ethimbo ele. ""Otwa pumbwa shili aaniilonga ye na ontseyo, unene miimpungu yopautekenika. Ngele owa tula etseyitho lyontumba lyoompito dhiilonga, nena oto ka yakula ondumba onene yomaindilo, moka ashike aantu yoopelesenda mbali oyo ye na uukwatya wokudheulilwa iilonga mbyoka,"" osho omunangeshefa gumwe ta ti. Omalimbililo galwe ngoka ga tumbulwa mpoka kaanangeshefa, mboka yamwe ya yambukile okuza koondoolopa dhilwe mOshitopolwa Erongo ongaashi ooveta dha kwata miiti dhi nasha noongeshefa oontshona naadhoka dhopokati, enwethomo lyoveta yiinima yaaniilonga koongeshefa dhawo. Omapulo gokanaku ge nasha noveta yaaniilonga okwa li ga pulwa osheendo shomupresidende, Ominista yIinima yAaniilonga nOnkalonawa, Alfeus !Naruseb, Ominista yElongo, Nangolo Mbumba oshowo Omupehaminista gwIipindi nIikwafambulika, Bernard Esau. Ooyene yoongeshefa oye uvite kutya edhengo enene lyeiteeko miilonga/omakanka gaaniilonga unene haga ningilwa ookampani ohagi idhimbikwa komahangano gaaniilonga, shoka hashi etitha omakanitho ogendji kookampani. ""Omanga oonkundathana dhi li metifa, ongeshefa kombinga onkwawo oya thikama, ano itayi eta po sha. Konima ngele oonkundathana odha adha etsokumwe, naaniilonga taya galukile kiilonga, nena omuntu oto ya futu ihe ngiini ngele ongeshefa okwa li manga ya pata omasiku ngoka gekanka?, osho omunangeshefa gumwe ta pula. Aanangeshefa oya eta po edhiladhilo andola Epangelo li kwatele mo aanashipambu yayooloka, mwa kwatelwa aakomeho yookampani nomahangano gepangelo ngele tashi ya kokuvuta oontotwaveta dha guma oveta yiinima yaaniilonga. Uuministeli wu na mo ontumbu moshinima shika, owi indile ookampani dhi kaleke po omakwatathano ga manguluka naaniilonga yawo, opo ko yiwe moshipala omakanka gaaniilonga. ""Ogendji gomomakanka ngoka hatu uvu konyala esiku kehe okwa li taga vulu okukeelelwa ngele aaniilonga pamwe naagandji yiilonga okwa li ye na omilanduveta dhemangulukilathano mookampani dhawo. Olundji aantu ohaya ningi ekanka ongonkatu yahugunina okukonga ekandulopo lyomikundu dhawo,"" osho ominista tayi ti. Aakalelipo yoongeshefa oontshona naadhoka dhopokati (SME) pomutumba ngoka oya holola omayeme gawo kutya ohaya dhengelwa kongudhi uuna tashi ya kootendela dhiilonga dhoka hadhi pewa po ashike ookampani dhoka oonene, molwaashoka ashike yo oya talika ko aanangeshefa aashona. Aakalelipo mbaka natango otaya ti oombaanga nomahangano giimaliwa otaga pewa ombedhi sho ga tula po iinakugwanithwapo ya yaga kegonga mokugandja omikuli koongeshefa, oshoka ohaya pula iitegelelwa iinene yokugamena omikuli dhawo omanga inaya yamukula omaindilo ngoka. Omanyenyeto agehe ngoka ga tseyithwa poshigongi shoka oga ndhindhilikwa nomayamukulo otaga ka gandjwa okuza kuuministeli wayooloka oshowo aatotiveta. "
Your experience on this site will be improved by allowing cookies.
