Omudiakoni meongalo laKahao Elcin okwa kufwa moilonga pokafimbo molwaashi vati naye e li moshikumungu shomashenge nokwa li ta kendabala okuhola omulumenhu mukwao va ye naye moixulo.
Omudiakoni Simon Ndaumbwa weedula 58 okwa koleka ye mwene ta ti oshoshili okwa kufwa moilonga manga ashike ina pewa omafiku kutya ota kala pedu fiyo onaini.
Omulumenhu weedula 24 Jeremiah Mushunina ha di kOnhuno, ou kwa li vati ta holwa kuSimon okwa hokolola ta ti okwa dengelwa ongodi komudiakoni te mu lombwele kutya ote mu pe oilonga meefitola ngeenge okwa itavele ok ya naye moixulo.
“Okwa ti okwa hala okuya moixulo naame, nokonima okwa ti naame ohandi ke mu denga konima shaashi okwa djuulukwa okudengwa konima,” Mushunina ta ti.
Okwa hokolola ta ti Ndaumbwa okwe mu lombwela yoo vali opo a dimine po Hendrick Shuudeni nokukufa mo oshibofa osho kwa li a patululila Shuudeni.
“Okwa lombwela nge ta ti oushenge oko wa kala, onghee okwa ti nandi xulife po okukala handi shadaula ovanyeumbo vomashenge,” ta ti.
Mushunina okwa ti okudja opo okwa tula okaaudio keenghundafana davo naNdaumbwa komalungula fiyo ta ke lihanene moshiwana.
Onghee naashi osha eta opo elelo longeleki yaElcin li kufe Ndaumbwa moilonga manga. Oshivike sha dja ko ina yaMushunina okwa tula okavidio komalungula ta nyenyeta kombinga yomudiakoni wongeleka yaKahao ta holo okaana kaye. Eshi a kwatafana naKundana omudiakoni Ndaumbwa okwa hokolola ta ti yee okwa dengela Mushunina nelalakano loku mu xunga omwenyo noshoyo oku mu kumaida opo a dje mo moshikumungu shomashenge. “Inandi hola Mushunina tuu nande. Ame omushamane a hombola e na ounona vane. Okwa li ashike handi kendabala okuyandja omayelele kuMushunina opo a lundulule okukakeka omadina ovanhu, nedina longeleka yaElcin molwaashi kasha li mondjila,” Ndaumbwa ta ti.
Ndaumbwa okwa dimina kutya okwa kufwa moilonga pauyuuki shaashi okwa monika epuko olo a ninga shili.
“Onda tulwa manga pedu molwaashi vati ohandi xwaxwameka nokuyambidida oshikumungu shomashenge. Onda monika epuko eshi nda popya oitya yomatukano mongodi naMushunina,” ta ti. Okwa koleka ta ti Mushunina oye e mu tumina etumwalaka kongodi yaye tete ta ti kutya okwa hala oku ya moixulo naye.
“Onde mu lombwela kutya na teelele manga shaashi inandi mwiika nawa. Onde mu lombwela kutya ohatu i naye moixulo ngeenge otwe liiki naye ashike hapaife,” Ndaumbwa ta hokolola.
Okwa weda po ta ti ke na vali ombili yokomwenyo molwaashi ovanhu otava ti kutya naye oku li moshikumungu shomashenge.
“Onda ninga epuko eshi nda popya oitya yomatukano naMushunina. Paife ohandi livele ombedi eshi nda popya kutya ohandi i moixulo naMushunina. Onghee Kalunga na diminenge po kwaashi nda popya shaashi osha tilifa oshiwana novaleli vaElcin,” te livele ombedi mwene.
Ndaumbwa okwa ti ota yandje ombili moshiwana molwaashi okwa tambula ko epuko laye onghee okwa ti okwa hala ashike ombili.
Lopokati opo Mushunina okwa weda po ta ti oshivike sha dja ko, okwa tuminwa omatumwalaka kuShuudeni te mu lombwele kutya ote mu pe oshimaliwa N$10 000 ngeenge okwa teya oshibofa.
Kundana eshi a kwatafana naShuudeni, okwa anya okutya ko sha kombinga yoshikumungu shokufuta Mushunina N$10 000. Omufitaongalo waRuacana elcin Shuudeni natango oku li pedu konima eshi a kufwa moilonga pokafimbo molwaashi vati a ya moixulo naMushunina lwoikando ya yooloka.
fhamalwa@nepc.com.na