ONGWEDIVA-Omulumenhu weedula 23 ou a ninga omafiku ta kongwa kopolifi shaashi vati ta tyakaleke mokukwata ounona voukadona onghonga, heva enda konima osho a kwatwa po.

Omulumenhu ou oku na oibofa yonghonga aishe kumwe ihamano, naivali yeteyo lomaumbo. 

Oshiningwanima osha ningwa konima yoivike ivali komukunda Omatando momudingonoko waNgwediva.

Omupopiliko wopolifi moshitukulwa shaShana Warrant Frieda Shikole okwa hokolola ta ti omufekelwa ota pangulilwa oibofa ine yomakwatonghonga.

Ounona va longelwa omunyonena omwa kwatelwa okaana keedula hamhano nokaana keedula 10.

Opolifi oya ti omulumenhu ou okwa li yoo vali a longa oimbuluma ivali yomakwatonghonga pefimbo kwa li e na omido 17 ashike ka kwa li a kwatwa po.

Omufekelwa ota holoka nena momhangu yaShakati nota pangulilwa oibofa yomakwatonghonga.

Omulumenhu ou okwa li yoo vali a kwatwa po mekwatafano loshibofa shetewo lomaumbo nokonima okwe li futile mo modolongo omudo wa djako.

Opolifi oya ti omufekelwa okwa tongolwa konima eshi oshiwana sha longela kumwe nopolifi okukonga omulumenhu ou.

Ovakwashiwana ove li unganeka okuninga omapekapeko pomudingonoko opo kwa li pa kwatelwa ounona onghonga.

Okudja opo konima omulumenhu ou eshi a kwatwa po, ounona ova pulwa ngeenge oye tuu eva kwata onghonga nove mu tongola.

Oshiningwanima shikwao, opolifi moshitukulwa shaMaheke otai kongo omulumenhu vati a kwata okatekulu keedula 14 onghonga ndele ta faduka po.

Oshiningwanima osha ningwa mexuliloshivike koodolopa yaGobabis.

Omukainhu weedula 29 naye okwa kwatwa onghonga ku kaume kaye pefimbo kwa li va nangala monduda imwe.

Oshiningwanima osha ningilwa molukanda Tamariskia, modoolopa yaSwakopmund mexuliloshivike.

Ota ku hohokololwa kutya omufekelwa okwa li tava nwine omalodu pamwe keendingosho nokonima vati ova ya keumbo lomufekelwa vaka nangale.

Omufekelwa okwa kwatwa po nota hokoloka momhangu. 

fhmalwa@nepc.com.na