Omukainhu weedula 31 nokahanana kaye komafiku a vali lwaapo va ti ova kana efiku a lekelwa moshipangelo shaNgela, konima yokupulumuna.
Otaku hokololwa Tresia David, a dile komukunda Oshindobe moshitukulwa shaHangwena, ina fika ko keumbo lavo konima yokulekelwa, no kape na ou e shi a pa a ningina. David va ti oku na oupyakadi wopamadiladilo.
Oukainhu ou va ti moshipangelo okwa lekelwa mo momafiku 28 omwedi wa dja ko. Paife okwa ninga omafiku 10 ehe wetike.
Ovakwapata vaye ova lopotela opolifi nokonima opolifi oya ninga eenghendabala doku mu konga ashike iha pa monika ouyelele.
Eshi a kwatafana naKundana Katrina Lukas ou e li omukulu waDavid okwa hokolola ta ti ondenge yaye oi na oudu wopamadilaadilo, yee ke helo naanaa okunwa omiti daye.
“Paife otwa limbililwa, ka tushi ngeenge oku li momwenyo nongeenge oku na tuu okaana kaye apa eli, ile pamwe okwe ka kupula shi,” ta ti.
Lukas okwa ti ota vele ombedi ovapangi eshi va lekela omunhu e na oupyakadi wopamadilaadilo, no ina ve mu dengela tete shaashi okwa li a yandja onomola yongodi yaye kovapangi opo ve mu dengele.
“Ovapangi onde va lombwela kutya Tresia oku na oudu wopamadilaadilo, onde va lombwela kutya itave mu lekela mo moshipangelo inava dengela nge,” ta ti.
Lukas okwa ti mefiku lotete lomwedi ou okwa ya koshipangelo opo a kata leko David ashike okwa lombwela kovapangi kutya okwa lekelwa mo.
“Ovapangi ava ve mu lekela havo kwa li nda pa onomola yongodi yange. Ava nda hangele mo tete onda hanga va dimbuka, va ti ova dimbwa okuyandja onomola yongodi yaye kuvakwao,” ta hokolola.
Okwa ti weda po ova ninga eenghendabala noku ninga omapekapeko momukunda wavo noshoyo oku pula omulumenhu waye ngeenge David okwa ya kuye.
“Omulumenhu waye okwa koleka kutya ina ya ko keumbo lavo,” ta ti.
Opolifi moshitukulwa shaHangwena otai indile moshiwana kwau e na ouyelele kombinga yomukainhu ou opo a lopotele opolifi keshe i li popepi ile oshipangelo shaNgela.
fhamalwa@nepc.com.na