Opolifi moshitukulwa shaMusati otai konakona oshibofa shomukulupe vati a ponokelwa kovalumenhu vane meumbo laye.
Oshiningwanima osha ningwa Omaandaxa efimbo loufiku momukunda Onambedi moshikandjohoololo Etayi.
Omupopiliko wopolifi moshitukulwa shaMusati Inspector Anna Kunga okwa hokolola ta ti omukulupe ou okwa hangika a nangala, ovafekelwa ova teya po omuvelo wonduda noku mu pula eeshapi dotuwa noimaliwa.
Otaku hokololwa kutya ovafekelwa ova manga omukulupe neengodi ndele tave mu mange kokanya nelalakano opo aha udike ngeenge ta kuu.
Ovafekelwa ova kufa mo omaliko a yooloka ngaashi o-tv nokufaduka po notuwa.
Opolifi oya ti fiyo onena kape na ouyelele kombinga yovafekelwa ava onghee opolifi otai indile moshiwana kwaau e na ouyelele kombinga yovafekelwa ava.
Otuwa inai monika fiyo opapa onghee opolifi oye lipyakidila nokukonga otuwa itoka yoToyota.