Opolisi moshitopolwa shaMusati oyi li molukongo lwomuntu ngoka a nana oshimaliwa shi thike N$25 800 okuza komayalulilo gombaanga yomukulupe gwomimvo 71.
Omukuluntu gwopolisi moshitopolwa shaMusati Ismael Basson okwa ti oshiningwanima shoka osha holoka omasiku ga yooloka pokati kaDesemba omumvo gwa yi naJanuali nuumvo.
Otaku hokololwa kutya okambomba komukulupe oka li ka yakwa megumbo, momukunda Onamafipa moshikandjohogololo shEtayi.
Opolisi oya hokolola kutya omuntu ngoka a yaka oshimaliwa shoka ota fekelwa ke shi gokokule, ihe oku na okukala omupambele nenge eshi omukulupe ngoka.
Omufuthi ita yaka iikando ya yooloka oshimaliwa oshishona, ta pititha po ethimbo, ihe oha yaka omasiku ga landulathana oshimaliwa oshindji.
Omukulupe ngoka kakwa li anuwa a dhimbulula ethimbo okambomba ke ka yakwa mo megumbo oshoka okwa li a ningi ethimbo inee ka longitha.
Opolisi otayi kumagidha oshigwana shi hulithe po okuyuga aakalupe iimaliwa, oshoka otashi ya etele uunkundi oshowo epiyagano lyomadhiladhilo.
Tayi ti, shoka osha ningwa komuntu gopopepi, ngoka e shi onomola yokupita yokambomba komukulupe.
Opolisi oya ti, ngoka e na uuyelele kombinga yoshiningwanima shoka na lopotele opolisi yi li popepi naye.
Oshiningwanima shoka osha lopotwa ashike omasiku omashona, sho komalungula kwa li kwa kongwa natango omukiintu gomugundjuka anuwa a yaka kuume komiihole oshimaliwa oshindji.
Sha ikolelela kuuyelele tau taambathanwa komalungula omukiintu ngoka anuwa okwa li nakuume ke komiihole mehala lyohotela, sho kwa li a yi ontuku noshimaliwa shoka.
Okwa indilwa kutya kehe ngoka ta ka mona omukiintu ngoka edhina lye lye lya tseyika ashike onga Naambo, ota ka pewa oshimaliwa sha thika N$15 000.
Inaku gandjwa uuyelele kutya iimaliwa ya yakwa omulumentu ngoka ingapi.
Natango otaku kongwa omuntu ngoka anuwa a yaka oshimaliwa shi thike poobilliona N$60 okuza mehangano tali ithanwa Credit Union Namibia.
Nonando shoka tashi taambathanwa komalungula, sha ikolelela koshifokundaneki sho The Namibian Sun, shomEtitano, Kakukutu komatango gopolisi moshilongo Joseph Shikongo okwa ti, kape na oshipotha shoshimaliwa shi thike mpoka sha yakwa moNamibia.
vkaapanda@nepc.com.na