Omukulupe weedula 60 womulumenhu omukwashiwana waZambia okwa kengelelwa nokutulwa tulwa mokatoo kookalyamupombo vOvanamibia eshi ve mu kufa omaliko aye.
Oshiningwanima eshi osha ningwa Etivali kolukanda Otjomuise moWindhoek efimbo loufiku potundi 22h30.
Nakuninga oshihakanwa okwa kufwa oshimaliwa US$16 150, eengodi daye dopeke mbali doIphone 11 no13 di li pongushu N$60 348, ouboba vaye vombaanga vavali noshoyo oshimaliwa shaNamibia N$1 000.
Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omukulupe ou okwa mona efano komalungula la tulwa ko kOmunamibia ta ti kutya ota landifa eshina lokupangela omambakumbaku.
Vati okudja opo omukulupe ova kwatafana komalungula ndele ta lombwelwa komufekelwa kutya ne uye kOnamibia opo a lande po eshina olo. Opolifi oya ti nakuninga oshihakanwa okwa dimina eshi a lombwela komufekelwa oo. Eshi omukulupe a fika kokapale keedila kaHosea Kutako omufekelwa okwa tuma vati kaume kaye opo e ke mu tale ko kokapale.
Vati eshi a fika modoolopa moWindhoek omukulupe okwa nana oshimaliwa N$1 500 opo a ka fute onduda yaye yokunangala noshoyo okukala e na oshimaliwa shokulongifa. Okudja opo vati kaume komufekelwa pamwe nomukulupe ova shinga va uka kOtjomuise opo a ka fute eshina olo tali landifwa.
Opolifi oya hokolola tai ti otuwa oyo oya shingwa sha uka moixwa ndele tava koyelele olukanda laTjomuise noshinano shishona.
Vati eshi va fika ponhele opo ova hanga po ovalumenhu vavali ve na eendjebo noshoyo eembele tava pula omukulupe oshimaliwa eshi kwa li e na.
Ova ningila omukulupe omatilifo kutya otave mu dipaa ngeenge ina hala okuyandja oinima aishe ei e kwete.
Okudja opo omukulupe okwa nyekwa oinima yaye ndele ovafekelwa tava faduka po nokufiya omukulupe moixwa.
Omukulupe okwa ende fiyo okOtjomuise oko a ka pukululwa kositaasi yopolifi.
Okwa ka lopotela opolifi kombinga yoshiningwanima eshi. Opolifi oye uya ponhele opo ta i ningi omakonakono kombinga yoshimbuluma eshi ashike fiyo opapa kape na omufekelwa a kwatwa po shaashi kape na ouyelele.
Ovafekelwa vati otava shingi otuwa yoCorolla yoluvala litiliyana. Omakonakono opolifi oku li taa twikile moshikumungu eshi. – fhmalwa@nepc.com.na