Omukainhu weedula 31 okwa fya eshi a tuwa nombele kohonda yaye Etivali efimbo lokonguloshi potundi 22h00 poundingosho momukunda Omalapapa moshitukulwa shaHangwena.
Nakufya okwa tongolwa oye Melila Penehafo Lukas omukalimo womomukunda Omalapapa.
Omukunakoni woimbuluma wopolifi moshitukulwa shaHangwena omupedu commissioner Zacharia Amakali okwa hokolola ta ti omufekelwa ova tameka tava tanguna nohonda yaye shaashi vati omukainhu waye okwa landelwa oinima ipe komulumenhu umwe.
Opolifi oya ti nokonima omufekelwa okwa kufa ombele yokapi ndele tatu omukainhu waye kofingo nomombuda loikando itano fiyo omukainhu ta xulifile ponhele opo.
Vati omufekelwa ova kala veli mekwatafano lopaihole nanakufya.
Omufekelwa okwa faduka po a uka moAngola eshi a mona kutya ohonda yaye oya fya.
Opolifi oya kala ili molukongo lokukonga omufekelwa ou fiyo ta monika Etitatu efimbo longula notakaholoka momangu yaEenhana nena.
Ovakwapata vaye ova shiviifilwa efyo laye nomakonakono opolifi otaa
twikile.
Opolifi oya kunghulila oshiwana opo shixulife po okuya keendingosho noilwifo shaashi oshi nyika oshiponga ngeenge omunhu e na ombele mokati kovanhu.