Omulumenhu womido 43 monooli yaBrazil okwa kwatwa po molwa oku k engelela eshi e li djaleka afa oye ina, nelalakano oku ka monena ina ombapila yokushinga.
Eshi Maria (60) ina yaHeitor Schiave a dopa konhele yoku konaakonena okushinga, oikando itatu, omonamati oo e li makeeninga woituwa okwa tokola opo a ka kwafele.
Ta djala okahema kaina koungala, nofulukweva, ta painda nawa oipanyala yaye nokanaela ka tilyana, teli tula okameikapa nohauxuuninwa ta djala okakeenisa, noku shinga moNova Mutum Paraná omo omhangela yaye ya li tai monika ya nyika okweenda nawa.
Ashike ovanambelewa ova tameka oku limbililwa noku mu tala nawa eshi va mona kutya ina fa nande omukainhu oo eli pokamutwe kaye oko eva pa.
“Okwa kendabala oku kala ita ulike nande outile washa. Okwa li e li tula omaikapa ihapu, oipanyala yaye oya li ya paindwa nawa, ye vali okwa li a djala oumbilingu noulyenge vawa voshikainhu,” umwe womovakonaakoni Aline Mendonça ta ti.
Opolifi oya ifanwa nomulumenu okwa kwatelwa ponhele oyo yoku konaakonena ovo va hala eembapila dokushinga. Omulumenhu ou okwa patululilwa oshibofa shekengelelo noku longifa eembapila doshilongo dihe fi daye.
“Okwe li hokolol nale. Okwa hokolola kutya ye keshi omukainhu, ashike ye omonamati womukainhu oo e li mefano, okwali ashike ta kwafele ina a mone ombapila yokushinga shaashi okwa kendabala unene efimbo noule,” omunambelewa ta hokolola.
Schiave vati okwa lombwela opolifi kutya ina kali nande eshi omhangela yaye, eshi okwe shi ninga ashike momutwe waye mwene.