Omulumenhu weedula 42 okwa fya konima eshi vati a pila mobashu yaye efimbo lokeengulasha. 

Oshiningwanima osha ningwa molukanda Donkerhoek modoolopa Khorixas Omaandaxa. 

Nakufya okwa tongolwa oye Hilary Sinvula omukalimo womoKhorixas. 

Omukulunhu wopolifi koshikondo shokukonakona oimbuluma Omupedukomufala Paavo Iiyambo okwa hokolola ta ti olutu laSinvula ole lituwa konima eshi obashu yaye ya pya po. 

Otaku hokololwa kutya Sinvula okwa pya po filufilu molwaashi olutu laye ola hangika la lungwina po kovashiinda shaye. 

Opolifi oya ti fiyo opapa kape na ouyelele kombinga yosheetifi shomundilo nomakonakono opolifi otaa twikile. 

Iiyambo okwa kumaida oshiwana opo shi kale sha kotokela omidilo unene tuu pefimbo e li loutalala u li metifa. 

Okwa ti efimbo eli olo unene la didilikwa lovanhu va ninga oihakanwa yokupila meenduda molwaashi ovanhu ohava tema omindilo tava kongo oupyu. 

Okwa weda po ta ti oshiwana nashi xulife po okutema omindilo ngeenge sha kolwa shaashi osha nyika oshiponga. fhamalwa@nepc.com.na