Omulumentu gwomimvo 40 oku li moshipangelo ta mono epango sho a li ta kambandhala okwiikutha omwenyo konima a tsu omukulukandhi gwe niikonde sigo omeso.

Sha ikolela kolopota yopolisi yiiningwanima ya holoka mehuliloshiwike, oshiningwanima shoka osha holoka Etitano moRocy Crest koWindheok.

Otaku hokololwa kutya aaholike mboka ya li metifa okutopoka pambelewa, inashi tseyika natango kutya oshike sha etitha enyenyeto sigo lya eta oshiningwanima shoka shi nyanyaleka.

Opolisi oya ti omukiintu ngoka a tseyika nedhina Helen Onesmus gwomimvo 43, okwa li a tsuwa iikando oyindji niikonde molutu, nokwa li a si kuululume wiilalo.

Omulumentu ngoka anuwa naye okwa li a kambadhala okwiikutha omwenyo sho a li i itsu iikando oyindji noombele.

Otaku hokololwa kutya oku li moshipangelo ta mono uuhaku, noku li wo metonatelo lyiikaha dhomiya dhaShinana.

Opolisi anuwa okwa li ya adha olutu lwaOnesmus lu li mondombe yombinzi, lwa kaalelwa kiikonde oshowo koombele ndatu.

Aakwanezimo yanakusa oya tseyithilwa, nomakonakono gopolisi oge li metifa.

Oshiningwanima shika osha holoka ashike konima yomasiku omashona sho omukiintu gwomimvo 38 a dhipaga kuume ke komiihole gwomimvo 28  sho a li e mu tsu nosikulufu.

Oshiningwanima shoka osha li sha holoka oshiwike sha zi ko momundhingoloko gwOniipa.

Nakusa okwa tseyika nedhina Samuel Amutengela Tuhafeni.

Opolisi oya kumagidha oshigwana shi hulithe po omukalo gwomahepeko momagumbo. 

Tayi ti kehe ngoka e na uudhigu tau mu thiminike okuninga iilonga inayi uka, na konge ekwatho kaahungimwenyo, kopolisi nenge aahongi. 

-vkaapanda@nepc.com.na