ONAMPIRA - Omunafaalama gwiikwamboga oshowo iiyimati okwa ti oshikunino shoka a li a toto konima a thigi po osikola, ote shi ende nawa notashi mu yambidhidha lela.
Silas Ekandjo gomomukunda Onampira moshitopolwa shaShana okwa ti okuningi omunafaalama osha kala ondjodhi ye, naashika okwa li sha yi miilonga sho a li a ndopa ondondo ye yahugunina mo2009.
“Oshikunino shandje otashi ithanwa “Fresh Fruits and Vegetable” moka ndi na mo omiti oshowo iiyimati niikwamboga ya yooloka,” ta ti ngaaka.
Ta ti, nonando a li a tameke oshikunino she ongokambadhala yopetameko, nena oshikunino she otashi humu komeho nosha talika ko oshikunino shimwe shomwaambyoka iinene momundhigoloko gwawo.
Ta gwedha po ta ti nonando ta pandula ngaaka kape na oshinima kaashi na uuwinayi, oya taalela uupyakadhi wiikwamboga hayi vulu okuninga nayi uuna iinayi pwa po okulandwa.
“Ookasitoma dhandje aalandithi yomomandaanda, nongele mboka esiku ndyoka inaya landa nawa yimwe ohatu yi ekelehi ashike oshoka oya ninga nayi,” ta popi ngaaka.
Ta ti oositola ndhoka hadhi landitha iikwamboga niiyimati momindhingoloko ndhawo kadhi hole okulanda kuyo.
Ta gwedha po ta ti Aanamibia kayi ihole, oya panda yaamboka tayi zi kokule.
“Onkalo yAanamibia taya landa iikwamboga nenge iiyimati kondje yiilongo omanga hayi monika moshilongo shetu oya nyenga oongeshefa odhindji dhatya ngiika,” ta ti ngaaka.
Ekandjo ta ti epangelo olya kala nokukumagidha oshigwana shi ye po niikunino okuyanda onkalo yondjala moshilongo, naashika osha Ii wo she mu pe omukumo opo e ye po noshikunino she mwene, oshowo okutsakaneka epangelo ondjilakati.
Ta ti, moshikunino she oku na mo iiyimati ngaashi omamango, omabanana, omapapaye, niikwawo oyindji.
Omu na wo iikwamboga ngaashi omboga yanakanena, omakunde, iilya, omatama oshowo iihakautu.
Ekandjo okwa ti, natango oku na edhilandhilo lyokugwedha po iikwamawawa moomwedhi tu uka.
“Onda pewa omukumo kukuume kandje ngoka e na oshikuku shoondjuhwa, ihe ota ti ongeshefa otayi ende nawa,oshoka ota landitha natango omayi,’’ ta popi ngaaka.
Ta ti, omayi ohaga eta po oshimaliwa tashi endelele oshoka oge na ookasitoma dhago kugo yene.-vkaapanda@nepc.com.na
Iikwamboga niiyimati…
Omunafaalama gwiikwamboga
niiyimati te shi
enditha nawa.
Efano: Otwe Ii pewa