ONAUSHE – Okaana kokakadona keedula 15, ke li mondodo onhihetatu vati oka kwatwa onghonga pefimbo ka li taka ende moixwa ka yuka keumbo.
Oshiningwanima osha ningwa oshivike sha dja ko komukunda Onaushe moshitukulwa shaShana efimbo lokomatango, ashike opo sha lopotwa oshivike eshi.
Omukulunhu koshikondo shopolifi shokukonakona oimbuluma moshitukulwa shaShana, omupedu Commissioner Theofilus Kamati okwa hokolola ta ti okaana oka shakeneka omufekelwa mondjila noku ka lombwela ke mu teelele.
Okudja opo omufekelwa okwa ningila okaana omatilifo kutya ote ka dipaa ngeenge inaka hala okuya naye moixulo nokonima okwe ka longela omunyonena wopaixulo.
Omufekelwa okwa faduka po, ashike vati okushivike kutya oye lyelye molwaashi oha di pomudingonoko opo.
Omakonakono opolifi otaa twikile nopolifi otai indile moshiwana kwaau e na ouyelele kombinga yomufekelwa ou opo oshiwana shi lopotele opolifi keshe i li popepi.
Ounona vovanafikola ova ninga oihakanwa yokukwatwa onghonga ngeenge tava di keefikola omanga vamwe ohava kwatwa onghonga momaumbo kovakwapata vavo.
Opolifi onghee tai kumaida ovadali opo va kotokele ounona vavo ngeenge tava di keefikola shaashi osha nyika oshiponga ngeenge okaana taka ende moixwa kehe na omutonateli.