OLUNO - Omunambelewa a kula ta longele kevyulonghalo kOluno vati okwa vaka oikulya yovanadolongo, omaadi okulya neefewa dokuwapeleka.

Otaku hokololwa kutya omulumenhu ou oha tula oikulya nomaadi meeshako ngeenge ta dimbuka. Umwe womunambelewa ta longele kevyulonghalo okwa lombwela Kundana ta ti omulumenhu oha popi oipupulu komuvelo ta ti meeshako omu na oikulya yoingulu yaye te i twaalele keumbo. Omulumenhu ou vati oshikumungu okwe shi ninga lwoikando ya yooloka.

Vati Etivali loshivike eshi omulumenhu ou motuwa yaye omwa hangika omandini e na eefewa dokuwapalekifa pefimbo kwa li ta piti koshivelo. “Okwe tu lombwela kutya inatu shi popya komukulunhu wevyulonghalo. Okudja opo otwa shivifila ombelewa yomukulunhu wevyulonghalo pOluno ashike natango okwa twikila ta ti inashi lopotwa kombelewa ya Commissioner General,” omunambelewa kevyulonghalo laLuno ta hokolola.

Eshi a kwatafana naKundana omupopiliko koshikondo shomavyulonghalo moNamibia Salmi Hangula okwa koleka ta ti oshoshili ope na oshikumungu sha lopotwa kombinga yomulumenhu ou vati a hangika nomandini eefewa. “Onda lopotelwa ashike kombinga yomandini eefewa ashike inandi uda kombinga yoikulya ya vakwa,” Hangula ta ti.

Okwa ti omakonakona okwa tameka nale okuningilwa omunambelewa ou.

Onghee okwa ti ngeenge omakonakono okwa pu opo nee ta ka talika kutya omulumenhu ou ota ningilwa shike. fhamalwa@nepc.com.na