Max Henrich

ONGWEDIVA - Omunambelewakulunhu woministeli yomauyelele nomakwatafano moshitukulwa shaShana Hileni Mwandingi okwe lipyakidila nokutalela po oikandjohoololo moshitukulwa shaye.

Okwa tongwa kutya, Mwandingi onghela okwa talela po oikandjohoololo ya fika puitatu nokwe lipyakidila natango okutalelapo ikwao ei ya xupa ko. Elalakano letalelepo eli okushiiva ashike oikandjohoololo oyo i li moshitukulwa shaShana, oshoyo okushiiva omahangano a yooloka oo e li moshitukulwa shaShana.

Mwandingi okwa popya kutya oministeli oi lile po okuyandja omauyelele, noya hala eembelewa dookansela di kale tadi yandje omauyelele aa kovakwashiwana.

Oministeli yomauyelele nomakwatafano moShana natango oi na wokweeta po omukalo wovanhu va kale tava mono ouyelele pamalungula. Ovanambelewa ottava kala hava yandje omauyelele pamalungula voo ovakwashiwana tavadulu okukala hava nyamukula efimbo olo.

Kansela womoshikandjohoololo shakatyali Joseph Mupetami okwa popya kutya voo noministeli yomauyelele nomakwatafano, ova kala ve na ekwatafano li na lela eenghono. Okwa weda po kutya yee okwa hala oministeli i kale tai shiivifile oikandjohoololo ya yooloka kombinga yoinyangadalwa oyo hava ningi moshikandjohoololo opo va dule okukala hava kufa ombinga.

Otwa pumbwa okuyelifila ovanhu keshe tuu osho tashi linyenge moshitukulwa. Otwa pumbwa yoo okudeula ovanyasha nghee ve na okukala tava toola eenghundana nokudikundaneka kombelewa. “Eshi sha pumbiwa eyandjo lomauyelele opo ashike oministeli tai dulu okuya komesho,” Mupetami ta weda po.

Oministeli oi na natango opoloyeka yokudeula ovatoolinghundana vomomikunda opo va kale hava yandja omauyelele kombelewa yakansela, yo ombelewa yakansela i kale tai yandja kombelewa yomauyelele nomakwatafano. Otwa pumbwa okukundaneka keshe tuu osho tashi linyenge mOshana.  Ope na yoo natango opoloyeka yokulonga ovakwashiwana okulongifa eekompiuta oshoyo oinima ikwao hai longo pamalungula okuyandja omauyelele.