Omulumentu gwomimvo 49 okwa hulitha Etiyali lyoshiwike shika sho anuwa a gwile mefuta, pethimbo a li miilonga mosikepa moka ha longele. 

Omugandji gomauyelele gopolisi moshitopolwa shErongo Ileni Shapumba okwa ti, oshiningwanima shoka osha holoka koWalvis Bay lwopotundi 07h50.

Otaku hokololwa kutya omulumentu ngoka okwa li pamwe naaniilonga aakwawo ye li 22 sho kwa li a dhengwa komweelo gosikepa ee ta gwile momeya. Opolisi oya ti, omulumentu ngoka okwa li ta longele mosikepa yedhina Laxe Dos. Otaku hokololwa kutya aaniilonga okwa li yi ipyakidhila taya gandja oonete dhoohi, sho omweelo ngoka gwa li gwa dhenge omulumentu ngoka, shoka sha etitha opo a gwile mefuta. Okwa li a pewa oshinima opo andola a ikwatelele ko ihe mefuta omwa li mu na ombepo onene ndjoka yal i tayi inyengitha osikepa noonkondo, naashoka osha eta opo a hutuke oshinima shoka a li a ikwatelela e ta gwile momeya.

Ta hokolola kutya okangendjo kokuhupitha oomwenyo oka li ka dhengwa meendelelo, naahupithi yoomwenyo mefuta okwa ye ya mbala, ashike oya li ya kanitha mpoka a gwila omolwoshikungulu shoka sha li sha etitha omakuthikuthi. Otaku hokololwa kutya olutu lwe olwa ka monika lwopotundi 08h45. 

Omulumentu ngoka anuwa okwa li a zala iikutu yokwiigamena, sho a li agwile mefuta ihe inayi mu kwathela. Okwa tseyika nendhina Daniel Haufiku. Aakwanezimo ye oya tseyithilwa.

Omimvo mbali dha piti, omuniilonga gwomomeya ngoka a li ha longele osikepa tayi ithanwa Hangana Seafood okwa li a si sho kwa li osikepa ndjoka ya li ya ningine mefuta moshitopolwa Erongo.

Otaku hokololwa kutya Carlo Gordon okwa li anuwa a shuna mombauto pethimbo tayi ningine sho kwa li uu vite kutya aantu ayehe kakwa li ya za mo mosikepa.

Olutu lwaGordon sigo onena inalu monika, nonando lwa kala nokukongwa.

Mboka ya li ya hupu mosikepa moka  sho kwa li ya zi mo, okwa li ya popi ookupitila miikundaneki kutya, Gordon okwa li a si pethimbo kwa li ta gwanitha po iilonga ye.

Ta ti, okwa li a kwashilipaleke kehe gumwe kutya okwa za mo mosikepa sho tayi ningine, nokwa li a ningi omupya sho inaa galukamo we. -vkaapanda@nepc.com.na