Victoria Kaapanda

Nonando oompango dhoshilongo otadhi ti, mboka taya longo iilonga yokukaleka po nokukeelela iimbuluma nuulunga kaye na okwi idhopa miinigwanima tayi teyagula po oshigwana, aapolisi onkene taya taaguluka oompango ndhoka.

Sha ikolela kepeko lyopolisi, omupolisi gumwe okwa mangwa po sho taku fekelwa a yaka eyogo lyompanda ndyoka kwali lya kana omanga lyi li momake ge. Otaku hokololwa oshiningwanima shoka sha holoka pokati komasiku 30 Sepetemba sigo 3 gaKotomba nuumvo, kOtjiwarongo.

Opolisi oya ti, omupolisi ngoka okwa li a pewa omayego goompanda, ge li gahamano okuza kehala tali ithanwa Ongava te ga fala kopolisi kOtjiwarongo, onga oshitopolwa shiilonga ye. Otaku hokololwa kutya omupolisi ngoka okwa li a nyolelemo ashike omayego gatano , omanga a li e na okunyolela mo gahamano.

Tayi ti, sho kwa li a pulwa kombinga yeyego ndyoka kali wetike , anuwa kakwa li ta gandja omatompelo gongushu. Opolisi oya ti eyego ndyoka lya kana okwa li lyi na ondjundo yookilogalama 12 oshowo ongushu N$96 000.

Omakonakono gopolisi otaga tsikile. Shoka osha holoka ashike omasiku omashona ga piti po sho aapolisi yaali yomOshakati mboka nayo ya li ya tulwa miipandeko iiwike iyali ya piti, ya li ya pewa omboloha, sho taya tamekelwa uulingilingi.

Onesmus Shimweefeleni (43) naHelena Shilongo (33) oya pewa ombooloha yooN$1 500 kehe gumwe, sha ikwatelela koompango dha tulwa po.

Oshipotha shoka shuulingilingi osha undulilwa komasiku 25 Januali 2023, omanga taku gandjwa ompito yomakonakono ga gwedhwa po gopolisi.

Aapolisi mboka ayehe oosisande mopolisi yosasiona yaShakati, nohaya longele moshimpungu shomakonakono giimbuluma oshowo moshimpungu shiikonga.

Aatamanekwa mboka yaali oya li ya londodhwa nokulombwelwa kutya inaya kwatathana naagandji yuumbangi yepangelo oshowo inaya idhopa momakonakono ngoka.

Sha ikolela komugandji gomauyelele gopolisi moshitopolwa shaShana Thomas Aiyambo okwa ti, aapolisi mboka anuwa okwa li ya pewa N$1 700 tango omanga inaya ka gwedhelwa ko N$1 000 sho ya shanga olopota yoshiponga shohauto iifundja, kutya ohauto okwa li tayi hingwa komuntu gumwe i ili pethimbo ya ningi oshiponga.

Oshiningwanima shoka okwa li kwa fekelwa sha holoka pokati komwedhi gwaKotomba oshowo Sepetemba nuumvo. Kape na uuyelele wothaathaa kutya aapolisi mboka yaali okwa li ya mangwa ngiini.

- vkaapanda@nepc.com.na