ONGWEDIVA - Ovakulupe otava hokolola noluhodi tava ti ova fiwa pomutenya kefyo lOmupresidente Hage Geingob molwaashi paife ova limbililwa ngeenge oshimaliwa shopendjela otashi ka wedelwa tuu.
Neudo Omupresidente Geingob okwa li a popya ta ti ota ka wedela oshimaliwa shovakulupe shi fike poN$2 000 ile N$3 000 manga ina fiya po oshikako shaye shokulela.
Onghundana ei okwa li ya hafifa ovakulupe neenghono molwaashi alushe ova kala nelineekelo mOmupresidente wavo kutya oye ashike e na olukeno novakulupe.
Pefimbo Geingob ta wilike okwa hanga ovakulupe hava kwata oshimaliwa shopendjela N$600 ndele te va wedele noshimaliwa N$100.
Okudja opo Omupresidente okwa kala ta twikile nokuwedela ovakulupe fiyo oposhimaliwa N$1 400 osho hashi kwatwa kovakulupe paife.
Maria Ochurus weedula 69 omukalimo womodoolopa yaTsumeb okwa ti okwa dengwa pomutima kefyo laGeingob molwaashi oye umwe kwa li e hole ovakulupe.
“Onda tameka okukwata opendjela pefimbo Geingob ta wilike ashike otwa kala nokuwedelwa lwoikando ya yooloka fiyo N$1 400, onghee otwa pandula komauwa ayeshe e tu ningila,” ta ti.
Natalia Sheefeni weedula 82 a dja komukunda Okatope okwa ti ina mona nale Omupresidente e na olukeno novakulupe a fa Geingob.
“Ohatu lili omutwe woshilongo, omutekuli wovanhu, omuleli muwa. Onghee ohatu lipula ngeenge ohatu ka mona tuu natango Omupresidente e na olukeno lovakulupe ngaashi Geingob,” ta ti.
Hangula Shimweefeleni weedula 78 a dja komukunda Onengali okwa ti Geingob okwa li omulumenhu a fimaneka okuwanifa po eudaneko laye.
“Otwa kanifa omulumenhu kwa li ta lalakanene okuhafifa ovakulupe. Pefimbo ta wilike otwa kala tu na ombili yokomwenyo molwaashi ohatu mono oshimaliwa shopendjela sha wana okudilila kepangelo,” Shimweefeleni ta ti.
Rita van Rooyen weedula 70 omukalimo womodoolopa yaTsumeb okwa ti edjepo laGeingob ola kuma ovanhu aveshe moshilongo.
“Pefimbo kwa li handi kwata N$600 kakwa li handi dulu okulanda oipumbiwa ya wana meumbo noshoyo okuyambidida ounona. Onghee paife ohandi dulu okuyambidida ovatekulu vange molwaashi oshimaliwa osha wedelwa k uGeingob,” ta ti.
Onghee ovakulupe ova pula Omupresidente ta landula ko opo a twikile neudaneko olo kwa li la popiwa kuGeingob kutya ota wedele oshimaliwa shavo. – fhamalwa@nepc.com.na